Pas librit “Sabah Bizi dhe brezi i tij” (2019), Besnik Dizdari befason teksa sapo ka nxjerrë nga shtypi librin e tij të ri – i 25-ti – me titullin: Shqipëria Europiane e Gianni De Biasi.

Në pamje të jashtme të duket se është një libër vetëm për Shqipërinë. Nuk është kështu. Po aq sa është për Shqipërinë ky është një libër edhe për Kosovën kur kujton se suksesi i Shqipërisë për në EURO 2016 është më shumë një sukes i futbollistëve të Kosovës se sa të Shqipërisë.

Për këte mjafton të lexosh këto rreshta nga libri:

“… Më 1942 “u themelua” në Tiranë Përfaqësuesja e Kosovës, përveçse u organizua Kampionati i Parë Mbarkombëtar Shqiptar me Prishtinë, Prizren e Pejë. Andej kah mesi i viteve ’90 kam qenë i pari që kam shkruar e zeza në të bardhë, që Kombëtarja të kishte lojtarë nga Kosova. Por kurrë nuk ma kishte marrë mendja se do të mbërrinte dhjetvjetshi i dytë i viteve ‘2000 dhe Kombëtarja e Shqipërisë do të shndërrohej në gati 80 përqind “kosovare”. Dhe ka ndeshje kur ata kanë qenë 9 apo 10, madje. Megjithate vështroni këte shifër marramendëse:

Në 80 lojtarët që ka aktivizuar në pesë vitet e tij me Shqipërinë trajneri Giani De Biasi, 60 prej tyre janë djem – europianë natyrisht – të Kosovës dhe vetëm 20 të Shqipërisë! Këtu me kuptimin që kaq, pra vetëm 20 ose vetëm 20 përqind, i ka prodhuar Kampionati Kombëtar i Shqipërisë. Dhe shtoj edhe këtu se në ndeshjet finale të Europianit FRANCA 2016, nga 20 lojtarët që luajtën, plot 14 ishin djem të Kosovës… “

Kapitujt e librit janë këto:

* Tregimet e ngjarjeve të Kombëtares 2012 – 2017.

* Kapitulli i fotove të shumta me ngjyra me detajimet e hollësishme të përmbajtjeve të tyre.

* Histori statistikore e Kombëtares së Shqipërisë.

* Ndeshjet themeluese të Kombëtares.

* Shqipëria nën drejtimin e trajnerit Gianni De Biasi (skedat e plota të hollësishme të 52 ndeshjeve).

* Kampionati Europian “France 2016” (Pasqyrë e plotë).

* Kombëtarja e Shqipërisë në të gjithë Kampionatet Europiane, Botërore, Ballkanike dhe Turne 1946-2019.

* Trajnerët në bilancet e të gjitha ndeshjeve 1946-2019 (Renditja e arritjeve të secilit).

* Klubi “Loro Boriçi”: Lojtarët me + 20 ndeshje me Kombëtaren.

* Bilanci Skematik: Shqipëria përballë shteteve me të cilët është ndeshur.

* Kombëtarja e Shqipërisë: Të gjitha ndeshjet e saj nga 1946 deri më 2019, sipas secilit vit, me trajnerët përkatës dhe llojin e kampionateve ku ka marrë pjesë.

Sportdashësit kosovar, librin mund ta gjejnë në Librarinë Buzuku në Prishtinë. VAR Kosova do të sjellë kohë pas kohe inserte interesante nga libri.