FC Ballkani e ka nisur me një barazim pa gola (0:0) aventurën në garat evropiane, pasi nuk arriti të mposhtë Connah's Quay në ndeshjen e parë të raundit të parë kualifikues.
Në sfidën e zhvilluar në "Deeside Stadium", suharekasit zhvilluan një ndeshje të kujdesshme ndaj skuadrës uellsiane, ku të dyja ekipet krijuan pak raste të pastra shënimi dhe nuk arritën ta thyejnë rezultatin.
Pjesa e parë u karakterizua me një lojë të fortë fizike, ku arbitri Johann Jonsson ndëshkoi me karton të verdhë Valentin Yacabo Serebe në minutën e 18-të dhe Callum West në minutën e 37-të.
Në pjesën e dytë, trajneri i FC Ballkani kërkoi më shumë freski në repartet e skuadrës. Në minutën e 64-të, Almedin Klinaku u zëvendësua nga Giovanni, ndërsa Edvin Kuç ia la vendin Ardit Deliut. Gjashtë minuta më vonë, Marsel Ismajlgeci u inkuadrua në vend të Albert Dienes.
Nga ana tjetër, Connah's Quay reagoi me dy zëvendësime në minutën e 73-të, duke aktivizuar Darren Stephenson dhe Frankie Deane në vend të Max Woodcock dhe Callum West. Në vazhdim të takimit, James Jones 76-të dhe Iwan Murray 83-të u ndëshkuan me kartonë të verdhë.
Në minutën e 86-të, Ballkani shfrytëzoi edhe dy zëvendësimet e fundit, me Bajram Jashanicën dhe Lorik Dobratiqin që zëvendësuan Gentrit Halilin dhe Toni Domgjonin. Dy minuta më vonë edhe vendasit bënë lëvizjet e fundit në formacion, kur Alex Hughes dhe Hussein Mehasseb u futën në lojë në vend të Michael Stone dhe Harry Franklin.
Në minutën e parë shtesë, para përfundimit të ndeshjes, Ardit Deliu u ndëshkua me karton të verdhë.
Gjithçka mbetet e hapur për ndeshjen e kthimit, ku Ballkani, para tifozëve të tij, do të synojë fitoren dhe kualifikimin në raundin e ardhshëm të garave evropiane.
