Plot 189 transferime janë bërë në Premier League para dhe gjatë edicionit 2025/2026. Dhe mediumi i fuqishëm sportiv, “The Athletic”, më i miri ishte ai i Granit Xhakës te Sunderlandi.
Televizoni zviceran, SRF, e ka vlerësuar këtë nder të madh për Xhakën. Transferimi i Xhakës është vlerësuar më i miri në bazë të një votimi.
Kalimi i Xhakës nga Bayer Leverkuseni te Sunderlandi është vlerësuar transferim më i mirë se ai i Rayan Cherkit te Manchester City dhe Michael Kayodes te Brentfordi.
Por pse 33-vjeçari është përzgjedhur transferimi më i mirë?
“Pasi as lojtarët gjenialë si Cherki nuk kanë transformuar ekipin në mënyrën që e ka bërë Xhaka. Ai solli kulturë të re në klub, brenda tij dhe në gjithë qytetin”, shkruan “The Athletic”.
Mediumi ka veçuar përvojën e Xhakës, cilësitë prej lidere dhe dëshirën e madhe për të luftuar në sulm dhe mbrojtje.
Xhaka u transferua verën e kaluar në klubin e Premier Leagues dhe menjëherë mori shiritin e kapitenit te Sunderlandi. Ai e udhëhoqi skuadrën e kthyer në elitë drejt vendit të shtatë. Kjo do të thotë se “macet e zeza” do të luajnë në Ligën e Evropës në edicionin e ardhshëm. Sunderlandi ishte në futbollin evropian vetëm një herë deri më tani. Ishte edicioni 1973/74 kur skuadra u paraqit në Kupën e Fituesve të Kupave. U ndal në raundin e dytë nga Sportingu portugez.
Xhaka tani gradualisht e kthen vëmendjen te Botërori 2026. Ai do të jetë kapiten dhe lider i pakontestueshëm i Zvicrës në Kampionatin Botëror që fillon më 11 qershor.
Botërori në SHBA, Kanada dhe Meksikë do të jetë i katërt për strategun e mesfushës.
