Kampionia e Kosovës, Drita, sonte nis zyrtarisht rrugëtimin në kualifikimet e UEFA Champions League me ndeshjen e parë ndaj kampiones së Lituanisë, FK Kauno Žalgiris.
Takimi zhvillohet në Kaunas dhe është përballja e parë në histori mes dy klubeve. Edhe pse favorit të lehtë konsiderohen vendasit për shkak të avantazhit të fushës dhe faktit se kampionati lituanez është në zhvillim e sipër, Drita synon të marrë një rezultat pozitiv përpara ndeshjes së kthimit në Kosovë.
Një nga avantazhet e skuadrës lituaneze është ritmi i ndeshjeve. Kauno Žalgiris ka zhvilluar tashmë një pjesë të mirë të sezonit në kampionatin vendas, ndërsa Drita vjen pas përfundimit të sezonit në Superligën e Kosovës dhe periudhës përgatitore verore.
Megjithatë, kampionia kosovare ka më shumë eksperiencë në garat evropiane dhe synon ta shfrytëzojë këtë për të marrë një rezultat që do ta mbante të hapur kualifikimin para sfidës së kthimit në stadiumin e saj.
Për Dritën, çdo rezultat pozitiv në Kaunas do të ishte një hap i rëndësishëm drejt raundit të dytë të Champions League dhe një mundësi e mirë për të vazhduar rrugëtimin evropian me më shumë besim.
Ndeshja e kthimit do të zhvillohet pas një jave në Kosovë, ku do të vendoset skuadra që avancon në raundin e ardhshëm të garës.
