Kampionja në fuqi, Argjentina, do të kërkojë sonte një tjetër hap drejt mbrojtjes së titullit të botës, kur përballet me Egjiptin në fazën e 1/8 së finales së Kupës së Botës 2026.
Sfida në Atlanta sjell përballë dy nga emrat më të mëdhenj të futbollit botëror – Lionel Messi dhe Mohamed Salah – në atë që pritet të jetë një nga ndeshjet më tërheqëse të kësaj faze.
Argjentina vjen në këtë takim pas një fitoreje dramatike ndaj Kepit të Gjelbër, ku siguroi kualifikimin vetëm pas vazhdimeve. Megjithatë, skuadra e Lionel Scalonit mbetet një nga favoritët kryesorë për triumfin final, me Messin që po kalon një Botëror fantastik dhe vazhdon të jetë lideri absolut i "Albiceleste".
Në anën tjetër, Egjipti ka shkruar histori duke siguruar për herë të parë një fitore në fazën me eliminim direkt të Kupës së Botës, pasi eliminoi Australinë pas penalltive. Tani, "Faraonët" synojnë surprizën më të madhe të turneut ndaj kampionëve në fuqi.
Përzgjedhësi i Argjentinës ka bërë disa ndryshime në formacion, ndërsa Julian Álvarez do ta nisë ndeshjen nga minuta e parë përkrah Lionel Messit në sulm. Nga ana tjetër, shpresa më e madhe e Egjiptit mbetet Mohamed Salah, i cili do të udhëheqë repartin ofensiv të ekipit afrikan.
Fituesi i kësaj përballjeje do të sigurojë një vend në çerekfinale, ku do të përballet me fituesin e sfidës mes Zvicrës dhe Kolumbisë.
