PSG dhe Aston Villa përballen këtë të mërkurë në “Red Bull Arena” në Superkupën e UEFA-s. PSG regjistron pjesëmarrjen e tretë në këtë kompeticion, ndërsa Aston Villa të dytën. Të dyja skuadrat e kanë fituar më parë këtë trofe.
Në ndeshjen e fundit, PSG barazoi 1-1 me Manchester United (parasezoni 2026/27). Në takimin e fundit, Aston Villa u mposht 2-1 nga Bayern München (parasezoni 2026/27).
Përballja e fundit mes këtyre dy skuadrave përfundoi me fitoren 3-2 të Aston Villas.
Paris Saint-Germain, nën drejtimin e Luis Enriques, është afirmuar si një nga skuadrat më të mëdha në historinë e UEFA Champions League, pasi u bë vetëm klubi i dytë në histori që e fiton turneun në dy vite radhazi. Fitorja përmes penalltive ndaj kampionit të Premier League, Arsenalit, në Budapest, e përforcoi trashëgiminë e PSG-së në Champions League dhe e zgjati rekordin e jashtëzakonshëm të klubit ndaj skuadrave angleze në Evropë.
Parisienët tashmë janë të pamposhtur në dhjetë ndeshjet e fundit ndaj skuadrave angleze në Champions League dhe Superkupën e UEFA-s. Këtë të fundit skuadra e Enriques e fitoi edhe sezonin e kaluar, kur mposhti Tottenhamin me penallti, pasi u rikthye nga disavantazhi prej dy golash për ta barazuar rezultatin në fund të ndeshjes.
Duhet të kthehemi deri në vitin 1982 për të gjetur pjesëmarrjen e fundit të Aston Villas në Superkupën e UEFA-s, për të cilën ishte kualifikuar pasi kishte fituar Kupën Evropiane. Në atë kohë, Superkupa zhvillohej me dy ndeshje dhe, pasi humbi 1-0 në “Camp Nou”, Villa u rikthye fuqishëm duke fituar 3-0 në “Villa Park” pas vazhdimeve për ta ngritur trofeun. Tani, në vitin 2026, skuadra nga West Midlands udhëton drejt Salzburgut me mundësinë për ta fituar Superkupën për herë të dytë.
Trajneri Unai Emery prej kohësh e kishte vendosur veten si mbreti i Europa League dhe e fitoi këtë kompeticion për herë të pestë në sezonin 2025/26, duke e udhëhequr me sukses Aston Villan drejt trofeut të parë të madh që nga viti 1996. Në finale, Aston Villa mposhti skuadrën e Bundesligës, Freiburgun, me rezultat 3-0, në një paraqitje dominuese.
Vlen gjithashtu të theksohet se Aston Villa ishte skuadra e fundit që e mposhti PSG-në në një kompeticion evropian, duke e bërë këtë në ndeshjen e kthimit të çerekfinales së Champions League në vitin 2025, megjithëse ishte skuadra e Luis Enriques ajo që u kualifikua tutje falë rezultatit të përgjithshëm.
