Futbolli shqiptar mund të ketë një mbrëmje të madhe në Evropë. Egnatia dhe Dinamo City do të luajnë sonte ndeshjet e kthimit të fazës “play-off”, me të dyja skuadrat që kanë ende gjithçka në duart e tyre.
Egnatia do të përballet në Norvegji me Lillestrømin, në ndeshjen që vendos një vend në fazën e ligës së Europa League. Takimi i parë në Rrogozhinë përfundoi pa gola, 0:0, duke e lënë kualifikimin plotësisht të hapur.
Skuadra e Nevil Dedes ka tashmë të siguruar së paku pjesëmarrjen në fazën e ligës së Conference League, pasi skuadrat e eliminuara në “play-off” të Europa League kalojnë direkt në këtë garë. Megjithatë, objektivi i Egnatias është shumë më i madh: fitorja ndaj Lillestrømit do ta dërgonte kampionen e Shqipërisë në fazën e ligës së Europa League dhe do të shënonte një tjetër sukses historik për klubin nga Rrogozhina.
Në Qipro, ndërkohë, Dinamo City do të kërkojë kualifikimin në fazën e ligës së Conference League ndaj Pafosit. Ndeshja e parë në “Elbasan Arena” u mbyll 1:1. David Fadairo kaloi Dinamon në epërsi në minutën e 79-të, por vetëm pak minuta më vonë Lelê barazoi nga penalltia për skuadrën qipriote.
Skuadra e drejtuar nga Ilir Daja udhëton kështu në Qipro pa disavantazh në rezultat. Një fitore do ta dërgonte Dinamo Cityn në fazën e ligës së Conference League, ndërsa një tjetër barazim pas 90 minutave do ta çonte përballjen në vazhdime.
Të dyja ndeshjet luhen sonte, më 27 gusht, ndërsa Egnatia dhe Dinamo City kanë mundësinë që ta shndërrojnë këtë mbrëmje në një prej më të suksesshmeve të viteve të fundit për klubet shqiptare në Evropë.
Egnatia kërkon një vend mes skuadrave të Europa League, ndërsa Dinamo City synon fazën e ligës së Conference League. Dy ndeshje në transfertë dhe dy kualifikime të mëdha në lojë.
