Mjaftuan vetëm 20 minuta në fushë që Lionel Messi të tregonte pse mbetet vendimtar. I inkuadruar nga stoli në pjesën e dytë, kapiteni argjentinas vulosi për fitoren 3 me 1 ndaj Jordanisë me një perlë nga goditja e dënimit.
Skuadra argjentinase kaloi në epërsi në minutën e 19-të, kur Giovani Lo Celso realizoi një gol spektakolar nga goditja e dënimit për rezultat 1 me 0.
Në minutën e 31-të, Lautaro Martínez dyfishoi epërsinë nga pika e bardhë, pasi VAR konfirmoi një penallti të fituar nga Marcos Senesi. Sulmuesi argjentinas shënoi me qetësi për 2 me 0, ndërsa më herët kishte goditur edhe traversën.
Jordania reagoi në pjesën e dytë, dhe minutën e 55-të, Mousa Al Tamari ngushtoi rezultatin në 2 me 1 me një goditje të saktë pas asistimit të Ehsan Haddad, duke rikthyer përkohësisht emocionet në takim.
Në minutën e 60-të, në fushë u aktivizua Lionel Messi, i cili ndryshoi ritmin e lojës së Argjentinës. Vetëm 20 minuta më vonë, ylli argjentinas realizoi një gol të bukur nga goditja e dënimit, duke vulosur fitoren 3 me 1 në minutën e 80-të.
Gjatë ndeshjes pati edhe disa raste të mira për Argjentinën, me Lautaro Martínez që goditi dy herë traversën, ndërsa Julian Alvarez dhe Thiago Almada iu afruan golit. Në anën tjetër, Jordania pati disa tentativa, por nuk arriti të bënte diçka më tepër.
