Premier League hap sonte një kapitull të ri. Sezoni 2026/27 nis në “Emirates”, ku kampioni në fuqi, Arsenal, pret Coventry Cityn, duke i dhënë start një tjetër gare që pritet të jetë e fortë si për titull, ashtu edhe për pozitat evropiane dhe mbijetesë.
Arsenali hyn në sezon si skuadra për t’u mposhtur. Ekipi i Mikel Artetës sezonin e kaluar i dha fund pritjes 22-vjeçare për titullin e kampionit të Anglisë dhe tash synon ta mbrojë trofeun. Përballë tij në ndeshjen hapëse do të jetë Coventry City, kampioni i Championshipit dhe një prej skuadrave të rikthyera në elitën angleze. Ndeshja nis sonte në ora 21:00 sipas kohës sonë.
Por sezoni i ri sjell shumë më tepër se mbrojtjen e titullit nga Arsenali. Disa prej klubeve më të mëdha hyjnë në kampionat me trajnerë dhe projekte të reja.
Manchester City nis epokën pas Pep Guardiolës, me Enzo Marescan në krye, ndërsa ndeshjen e parë do ta zhvillojë në shtëpi kundër Bournemouthit. Liverpooli, tash nën drejtimin e Andoni Iraolas, ka një prej testeve më të vështira të javës së parë – udhëtimin te Newcastle United. Ndërkohë, Chelsea i Xabi Alonsos e hap sezonin të hënën me derbin londinez kundër Fulhamit.
Edhe Manchester United synon të vazhdojë ngritjen pas vendit të tretë në sezonin e kaluar. Skuadra e Michael Carrick e nis kampionatin në udhëtim te Hull City, një tjetër skuadër që është rikthyer këtë sezon në Premier League.
Ndeshjet e javës së parë
E premte Arsenal – Coventry City, 21:00
E shtunë Hull City – Manchester United, 13:30 Everton – Crystal Palace, 16:00 Ipswich Town – Sunderland, 16:00 Nottingham Forest – Leeds United, 16:00 Brentford – Tottenham, 18:30
E diel Brighton – Aston Villa, 15:00 Manchester City – Bournemouth, 15:00 Newcastle United – Liverpool, 17:30
E hënë Fulham – Chelsea, 21:00
Oraret janë sipas kohës në Kosovë.
Premier League do të zhvillojë gjithsej 380 ndeshje, ndërsa xhiroja e fundit është paraparë për 30 maj 2027. Gara nis sonte, me Arsenalin që kërkon të dëshmojë se titulli i sezonit të kaluar ishte fillimi i një cikli të ri, ndërsa Manchester City, Liverpooli, Chelsea dhe Manchester United synojnë t’ia marrin kurorën.
Pas disa muajsh pritjeje, kampionati që prodhon çdo javë befasi, gola dhe dramë është përsëri këtu.
