Shqipëria e nis sonte rrugëtimin në edicionin 2026/27 të UEFA Nations League, ku përballë do ta ketë Bjellorusinë. Ndeshja zhvillohet nga ora 20:45, në “Air Albania”, dhe është sfida e parë e kuqezinjve në Grupin 1 të Ligës C. Kuqezinjtë hyjnë në këtë cikël me Rolando Maran në krye të Kombëtares. Trajneri italian mori drejtimin pas largimit të Sylvinhos dhe kjo do të jetë ndeshja e tij e parë zyrtare në stolin e Shqipërisë.
Shqipëria synon që përballja me Bjellorusinë të shërbejë si një pikë kthese pas një periudhe të vështirë rezultatesh. Kuqezinjtë kanë humbur pesë ndeshjet e fundit në të gjitha garat, ndërsa në qershor u mposhtën me rezultat minimal nga Izraeli dhe Luksemburgu. Në anën tjetër, Bjellorusia vjen me seri dukshëm më pozitive dhe nuk ka humbur në gjashtë paraqitjet e fundit.
Për këtë takim, Shqipëria do të ketë disa mungesa. Qazim Laçi dhe Adrion Pajaziti janë tërhequr nga grumbullimi për shkak të lëndimeve, ndërsa portieri Thomas Strakosha gjithashtu mungon. Në mungesë të tij, në Kombëtare është rikthyer Etrit Berisha, pas afro dy vitesh. Ndërkohë, Armando Broja nuk është pjesë e këtij grumbullimi, duke lënë konkurrencën në repartin ofensiv mes Rey Manajt, Mirlind Dakut dhe Cristian Shpendit.
Shqipëria ka kujtime të mira nga përballjet e fundit me Bjellorusinë. Kuqezinjtë janë të pamposhtur në katër takimet e fundit direkte, me tri fitore dhe një barazim, ndërsa në Nations League të vitit 2020 fituan të dyja përballjet ndaj këtij kundërshtari.
Grupi i Shqipërisë përbëhet gjithashtu nga Finlanda dhe San Marino, ndërsa vendi i parë siguron ngjitjen direkte në Ligën B. Për kuqezinjtë, një nisje pozitive ndaj Bjellorusisë do të ishte e rëndësishme jo vetëm për pikët, por edhe për të rikthyer besimin para vazhdimit të fushatës.
Shqipëri – Bjellorusi 📍 Air Albania, Tiranë 🗓 26 shtator 2026 ⏰ 20:45 🏆 UEFA Nations League, Liga C
