Në episodin më të ri të podcastit “Arena e Yjeve”, mysafir ishte futbollisti kosovar Viktor Kuka, i cili tregoi momente nga karriera e tij në futbollin kosovar, me kujtime të veçanta dhe sfida që e shoqëruan ndër vite.
Biseda nisi nga koha e tij te Drita, ku Kuka foli për mbështetjen e tifozëve “Intelektualët” dhe për histori që, sipas rrëfimit, dëshmojnë përkushtimin e tyre ndaj klubit. Më pas ai solli edhe një detaj të pazakontë: kontrata e tij pesëvjeçare me Dritën lidhej me udhëtimin e tij me biçikletë nga Prishtina në Gjilan për të qenë pjesë e stërvitjeve.
Kuka kujtoi edhe sukseset e arritura në karrierë, duke përmendur titujt kampion të fituar me Prishtinën dhe Dritën. Ai i vuri në pah këto momente si ndër më të rëndësishmet në rrugëtimin e tij si futbollist.
Në pjesën vijuese, futbollisti ndau një zhgënjim të madh nga sezoni i kaluar, kur nuk arriti ta ndihmonte Vëllaznimin në sigurimin e rikthimit në Superligën e Kosovës. Sipas rrëfimit, kjo i solli emocione dhe ndjenjë përgjegjësie pas përfundimit të kampionatit.
