Anglia mposhti Meksikën në një duel spektakolar, Bellingham shkëlqen me dopietë, por "Tre Luanët" nuk e patën të lehtë deri në fund.
Anglia ka siguruar një fitore dramatike me rezultat 3:2 ndaj Meksikës, në një ndeshje plot emocione, gola, penallti, karton të kuq dhe tension deri në sekondat e fundit.
Heroi i skuadrës angleze ishte Jude Bellingham, i cili realizoi dy gola në pjesën e parë dhe vendosi themelet e suksesit të "Tre Luanëve".
Mesfushori hapi serinë e golave në minutën e 36-të me një goditje me kokë pas asistimit të Bukayo Saka, ndërsa vetëm dy minuta më vonë shënoi sërish nga afërsia, kësaj radhe pas një asistimi të Harry Kane.
Meksika reagoi para pushimit dhe ngushtoi epërsinë në minutën e 42-të, kur Julian Quinones realizoi për 2:1 pas një situate nga goditja e dënimit, duke e lënë sfidën plotësisht të hapur për pjesën e dytë.
Anglia mbeti me një lojtar më pak, pasi Jarell Quansah u ndëshkua fillimisht me karton të verdhë, por pas rishikimit nga VAR-i vendimi u ndryshua dhe mbrojtësi u përjashtua me karton të kuq në minutën e 54-të.
Megjithatë, edhe me dhjetë lojtarë, anglezët arritën të shënonin golin e tretë. Anthony Gordon fitoi një penallti, të cilën Harry Kane e ktheu në gol në minutën e 60-të për rezultatin 3:1.
Meksika nuk u dorëzua dhe vetëm nëntë minuta më vonë fitoi edhe ajo një penallti pas ndërhyrjes së Harry Kane ndaj Brian Gutierrez.
Pas konfirmimit të VAR-it, Raul Jimenez ishte i saktë nga pika e bardhë, duke ngushtuar shifrat në 3:2. Minutat e fundit ishin në favor të Meksikës, e cila ushtroi presion të madh ndaj portës së Jordan Pickford.
Skuadra amerikano-veriore krijoi disa raste të rrezikshme me Raul Jimenez, Edson Alvarez dhe Alvaro Fidalgo, fitoi një numër të madh goditjesh nga këndi dhe përfitoi plot 11 minuta shtesë, por nuk arriti të gjente golin e barazimit.
