Qyteti i Budapestit të Hungarisë sonte do të jetë qendra e botës së futbollit.
Nën dritat e stadiumit "Puskás Aréna", dy skuadra me ëndrra të mëdha dhe objektiva të ndryshme do të zbresin në fushë për të luftuar për trofeun më të lakmuar të futbollit evropian për klube.
Në njërën anë qëndron Paris Saint-Germain, kampioni në fuqi që synon të dëshmojë se dominimi i tij nuk ishte rastësi.
Në anën tjetër është Arsenali, një klub me histori të pasur futbollistike, por që ende nuk e ka ngritur trofeun e UEFA Champions League.
Kjo nuk është thjesht një finale, por përballja mes përvojës së fituesit dhe etjes së një klubi që kërkon të shkruajë histori.
PSG pritet të zbarkoj me talentin dhe shpejtësinë e Ousmane Dembélé dhe kreativiteti e Khvicha Kvaratskhelia të cilët mund të bëjnë diferencën në çdo moment.
Ndërkohë, Arsenali i Mikel Arteta ka ndërtuar rrugën drejt finales me disiplinë, karakter dhe një futboll modern, ku Bukayo Saka mbetet një nga emrat më të rrezikshëm për mbrojtjen kundërshtare.
Kur ora të shënojë 18:00, çdo statistikë, çdo parashikim dhe çdo analizë do të mbetet pas.
Do të jenë vetëm 90 minuta ose ndoshta më shumë që do të vendosin se kush do të ngrejë lart trofeun më prestigjioz të futbollit evropian.
Rezultati i pesë betejave PSG-Arsenal
Paris Saint-Germain dhe Arsenal janë përballur pesë herë në vitet e fundit.
Ndeshja e fundit u zhvillua më 7 maj 2025, ku PSG fitoi 2-1 ndaj Arsenalit. Para saj, PSG fitoi edhe në Londër më 29 prill 2025 me rezultat 1-0.
Më 1 tetor 2024, Arsenali kishte triumfuar 2-0 në shtëpi.
Dy përballjet e mëparshme mes tyre në fazën e grupeve të Champions League në vitin 2016 përfunduan barazim: 2-2 në Londër dhe 1-1 në Paris.
Në total nga këto pesë ndeshje, PSG ka 2 fitore, Arsenali 1 fitore dhe 2 ndeshje kanë përfunduar barazim.
