Menaxheri i Kombëtares së Kosovës, Bajram Shala ka thyer rregulloren e kodit të sjelljes së “Lequipe” për votimin e futbollistit më të mirë të vitit “Ballon D’or”.
Ai kishte votuar si gazetar nga Kosova, pavarësisht se është pjesë e FFK-së.
Nga “L’equipe” bashkëpunëtorët e “France Football” të cilat e organizojnë ceremoninë e ‘Ballon D’or” kanë konfirmuar për KALLXO.com se Bajram Shala është përjashtuar nga mundësia e votimit për vitin e ardhshëm.
“Në dritën e informacioneve që na dhatë dhe të cilat ai na i konfirmoi, është e qartë se ai nuk do të jetë më pjesë e jurisë vitin e ardhshëm si përfaqësues i Kosovës.” – thuhet në përgjigjen e tyre për KALLXO.com.
Informacionet se Bajram Shala është pjesë e Federatës së Futbollit të Kosovës, ata i morën vetëm pas interesimit të KALLXO.com.
Bajram Shala, i ftuar në podcastin Versus të TeleSport, më 08.10.2026, e kishte konfirmuar se ai voton si gazetar nga Kosova dhe kishte votuar me më së shumti pikë, sulmuesin e Anglisë, Harry Kane.
Rregullorja të cilën e nënshkruajnë anëtarët e jurisë, në këtë rast edhe gazetarët nga shtetet, thotë se ata duhet t’i shmangin paragjykimet, ndjenjat personale ndaj klubeve, shteteve, federatave e lojtarëve të caktuar.
“Ashtu si çdo anëtar i jurisë, përfaqësuesi i Kosovës ka nënshkruar një kod mirësjelljeje para votimit, i cili përcakton, ndër të tjera, se: “Anëtarët e jurisë duhet të shmangin paragjykimet, lidhjet ose ndjenjat personale ndaj klubeve, shteteve, federatave kombëtare, konfederatave ose lojtarëve të caktuar, të cilat mund të cenojnë objektivitetin e gjykimit të tyre.”- thuhet në përgjigjen e organizatorëve për KALLXO.com, më 16.10.2026.
Pas intersimit të KALLXO.com, organizatorët e ceremonisë së ‘Ballon D’or’ kanë kontaktuar me Bajram Shalën dhe i njëjti i ka konfirmuar informacionet që i janë shtruar si pyetje nga KALLXO.com.
Organizatorët kanë konfirmuar se Bajram Shala ka votuar vitin e kaluar, në 2025 si gazetar i RTV21, ndërsa këtë vit ka votuar si gazetar freelancer.
“Duket se ka pasur një keqkuptim nga ana e tij, pasi ai mendonte se kjo vlente vetëm në rastet kur në lista përfshihej një lojtar nga Kosova. Z. Bajram Shala, i cili na tha se është gjithashtu gazetar, ka votuar për RTV 21 vitin e kaluar dhe si profesionist i lirë (freelancer) këtë vit. Vota e tij është e qëndrueshme dhe nuk tregon asnjë shenjë anësie.” – thuhet në përgjigjen e tyre.
Në një përgjigje tjetër të organizatorëve për KALLXO.com thuhet se ripërtëritja e jurisë, ndryshimet në përbërjen e saj dhe kontaktimi i anëtarëve të jurisë janë çështje që i takojnë vetëm drejtuesve të redaksisë së France Football.
Organizatorët nuk kanë dhënë detaje të sakta se si u përzgjedh Bajram Shala për të votuar si përfaqësues i gazetarëve nga Kosova.
Ata vetëm thanë se ky votim u mundësua kur Kosova ishte në mesin e 100 kombëtarëve në ranglistën e FIFA-s.
Tutje ata shtuan se juria mund të ndryshoj varësisht rrethanave të krijuara te lista e anëtarëve të jurisë.
“Lista e anëtarëve të jurisë votuese ekziston prej shumë vitesh. Megjithatë, ajo mund të pësojë ndryshime herë pas here, në varësi të rrethanave personale të anëtarëve individualë të jurisë: dëshira për të dorëzuar detyrën, pensionimi, ndryshimi i profesionit apo i pozitës, ose vdekja, si ndodhi fatkeqësisht këtë vit me anëtarin tonë të jurisë, japonezin me shumë vite përvojë, Shuichi Tamura.” – thuhet tutje në përgjigjen e organizatorëve.
KALLXO.com ka provuar të kontaktojë me menaxherin e Kombëtares së Kosovës, Bajram Shalën, por deri në publikimin e artikullit, ai nuk është përgjigjur në pyetjet tona.
KALLXO.com ka telefonuar dhe i ka dërgues disa pyetje Shalës që nga 16 tetorit, por i njëjti nuk ka kthyer pëgjigje.
Bajram Shala iu bashkua stafit të Federatës së Futbollit së Kosovës në shtator të vitit 2014, kur Kosova nuk ishte ende pjesë e FIFA-s dhe UEFA-s.Aktualisht ai mban pozitën e menaxherit të skuadrës A te Kosova.
Në emisionin Versus të organizuar nga Telesport ku ishte i ftuar Bajram Shala i cili zbuloi se ai voton “si gazetar nga Kosova” pasi u pyet se kujt do ia jepte “Topin e Artë”, deklaroi se e kishte votuar Harry Kane-in për vendin e parë dhe e pozicioni Kylian Mbappen në pozitën e dytë ndërsa për vendin e tretë tha se “duhna me e qel emailin me e pa saktë kujt ia kam dhënë votën”.
Ceremonia për ndarjen e këtij çmimi pritet të mbahet më 26.10.2026 në Londër, ndërsa këtë vit mbahet edicioni i 70-të i ndarjes së tij.
Sipas faqes zyrtare ballondor.com, fituesi i Topit të Artë nuk përcaktohet nga spekulimet, por nga një sistem votimi që administrohet nga “France Football”.
Të gjitha rregullat që vijojnë janë publikuar nga organizatori në artikullin e datës 07.10.2026.
Në këtë artikull thuhet se çmimi ndahet nga një juri ndërkombëtare gazetarësh të specializuar, me një përfaqësues për vend.
Për trofeun e meshkujve thuhet se votojnë përfaqësuesit e 100 vendeve të para të renditjes së FIFA-s, kurse për atë të femrave, 50 përfaqësuesit e vendeve të para.
Renditja e marrë parasysh thuhet se është ajo në fuqi kur u publikuan listat e nominuarve, më 08.09.2026.
Tutje thuhet se lista prej 30 kandidatëve nuk e hartojnë anëtaret e jurisë por thuhet se ajo përpilohet nga redaksia e France Football, nga anëtarë të redaksisë së L’Équipe, nga së paku një anëtar i jurisë së edicionit të kaluar, dhe nga ambasadorët e UEFA-s të cilët thuhet se janë Luis Figo e Fabio Capello për meshkujt ndërsa Nadine Kessler për femrat.
Secili anëtar i jurisë bëhet e ditur se zgjedh dhjetë lojtarë nga kjo listë, të renditur sipas meritës.
Sipas artikullit të publikuar nga kjo uebfaqe, ata marrin 15, 12, 10, 8, 7, 5, 4, 3, 2 dhe 1 pikë.
Pra, çmimin e fiton lojtari me më së shumti pikë të grumbulluara.
Mirëpo nëse dy lojtarë përfundojnë me pikë të barabarta thuhet se vendos numri i votave për vendin e parë por po vazhdoi barazimi thuhet se kalohet te votat për vendin e dytë dhe pastaj për të tretin.
Për çdo kontestim tjetër në uebfaqe thuhet se organizatori e ka lënë fjalën e fundit te kryeredaktori i France Football, ai që kjo uebfaqja e quan vendimmarrës.
