Tifozët e Al-Taawoun provokojnë Rúben Nevesin me emrin e Diogo Jotës, portugezi reagon duke treguar drejt qiellit

Një skenë e shëmtuar ka marrë vëmendje të madhe pas ndeshjes së Saudi Pro League ndërmjet Al-Taawoun dhe Al-Hilal.

Gjatë takimit, një grup tifozësh të Al-Taawoun nisën të brohorasin vazhdimisht emrin “Jota! Jota! Jota!” në drejtim të mesfushorit të Al-Hilal, Rúben Neves, duke përdorur emrin e mikut dhe ish-bashkëlojtarit të tij të ndjerë, Diogo Jota, për ta provokuar emocionalisht.

Neves reagoi menjëherë ndaj brohoritjeve. Portugezi u kthye kah tribuna, tregoi me gisht drejt qiellit dhe, sipas raportimeve, iu drejtua tifozëve me fjalët: “Zoti ju sheh.”

Diogo Jota dhe Neves kishin një lidhje të ngushtë si në fushë ashtu edhe jashtë saj. Ata kishin luajtur së bashku te Porto, Wolverhampton dhe në Kombëtaren e Portugalisë. Jota humbi jetën në një aksident tragjik automobilistik në Spanjë në korrik të vitit 2025.

Incidenti ka shkaktuar reagime të shumta, pasi emri i futbollistit të ndjerë u përdor si mënyrë për të provokuar Nevesin gjatë ndeshjes.

Në aspektin sportiv, Al-Hilal dominoi takimin, duke e mposhtur Al-Taawoun me rezultat të thellë 6:0, por pamjet e incidentit në tribuna morën një pjesë të madhe të vëmendjes pas ndeshjes.