VAR Kosova ka vizituar KF Përparimi, një shkollë futbolli që punon me disa grupmosha të fëmijëve dhe që synon zhvillimin e tyre jo vetëm si futbollistë, por edhe si individë.
Gjatë vizitës, patëm mundësinë të shohim nga afër mënyrën e organizimit të stërvitjeve, punën e trajnerëve me fëmijët dhe filozofinë mbi të cilën funksionon klubi.
Trajneri kryesor i shkollës, Përparim Shala, thotë se pikërisht përkushtimi ndaj fëmijëve është ajo që e dallon KF Përparimin.
“Ajo që na dallon është përkushtimi ynë ndaj fëmijëve. Për ne, futbolli nuk është vetëm sport, por edhe një mjet për zhvillimin, edukimin dhe formimin e tyre”, thotë Shala për VAR Kosova.
KF Përparimi përfshin grupmoshat U7, U9, U11, U13 dhe U15, ndërsa programet stërvitore përshtaten sipas moshës dhe nivelit të zhvillimit të secilit grup.
Në klub, krahas përgatitjes futbollistike, rëndësi e veçantë i kushtohet edhe vlerave që fëmijët marrin përmes sportit.
“Vlerat kryesore janë respekti, disiplina, përkushtimi, puna dhe bashkëpunimi. Këto parime janë të rëndësishme jo vetëm në futboll, por edhe në jetën e përditshme”, shpjegon Shala.
Sipas tij, te një lojtar i ri nuk mjafton vetëm talenti. Dëshira për të mësuar, puna dhe këmbëngulja janë elementet që mund të bëjnë diferencën në zhvillimin afatgjatë të një futbollisti.
“Talenti është i rëndësishëm, por puna dhe këmbëngulja janë ato që bëjnë diferencën”, thotë ai.
Gjatë vizitës sonë pamë edhe punën që bëhet me fëmijët që tregojnë potencial të veçantë. Përveç stërvitjeve në grup, në KF Përparimi organizohen edhe seanca në grupe më të vogla dhe punë individuale, në varësi të nevojave të secilit lojtar.
Për trajnerin kryesor, zhvillimi i karakterit mbetet po aq i rëndësishëm sa ai teknik.
“Synojmë që fëmijët të zhvillohen jo vetëm si futbollistë, por edhe si individë të përgjegjshëm, të disiplinuar dhe bashkëpunues”, thekson Shala.
Në KF Përparimi, suksesi nuk matet vetëm me rezultate apo trofe. Për stafin e klubit, çdo hap përpara i një fëmije konsiderohet arritje.
“Na bën krenar çdo përparim i fëmijëve. Çdoherë që shohim një fëmijë duke u zhvilluar, duke fituar vetëbesim dhe duke përmirësuar aftësitë e tij, e konsiderojmë një sukses të rëndësishëm për klubin”, thotë Shala.
Ambiciet e klubit për vitet e ardhshme lidhen me një organizim edhe më të mirë, kushte më të avancuara për stërvitje dhe ndërtimin e një akademie që do të zhvillojë lojtarë nga vetë sistemi i klubit.
“Dëshirojmë ta shohim KF Përparimin si një klub edhe më të organizuar, me kushte më të mira stërvitore dhe me një akademi që zhvillon lojtarë të talentuar nga vetë klubi”, shprehet ai.
Për Shalën, lidhja me KF Përparimin shkon përtej rolit të trajnerit.
“Për mua, KF Përparimi është më shumë se një klub. Është pasion, përgjegjësi dhe një pjesë e rëndësishme e jetës sime.”
Përmes vizitave të tilla, VAR Kosova synon të sjellë më afër publikut punën që bëhet në klubet dhe shkollat e futbollit për fëmijë, si dhe t’u japë më shumë hapësirë talenteve të rinj dhe trajnerëve që punojnë çdo ditë për zhvillimin e tyre.
Vizita jonë në KF Përparimi është shoqëruar edhe me një video të veçantë nga ambientet dhe stërvitjet e klubit, të cilën mund ta ndiqni më poshtë.
