Holanda ka dhuruar një spektakël të vërtetë futbolli në UEFA Nations League, duke turpëruar Greqinë me rezultatin e thellë 7:0, në ndeshjen e zhvilluar këtë të premte në stadiumin “Johan Cruijff Arena” të Amsterdamit.
Skuadra holandeze e nisi furishëm takimin dhe nuk i la pothuajse asnjë hapësirë kundërshtarit. Crysencio Summerville zhbllokoi rezultatin në minutën e 6-të, ndërsa Tijani Reijnders dyfishoi rezultatin në minutën e 12-të, pas asistimit të Joey Veerman.
Vetëm gjashtë minuta më vonë, Reijnders ishte sërish protagonist, duke kontribuar në golin e tretë të shënuar nga Donyell Malen. Holanda vazhdoi dominimin dhe në minutën e 33-të Denzel Dumfries shënoi golin e katërt, pas asistimit të Reijnders.
Pa u mbyllur pjesa e parë, në minutën e 40-të, Malen realizoi golin e pestë, këtë herë pas pasimit të Jurrien Timber. Kështu, skuadrat shkuan në pushim me epërsinë bindëse 5:0 të vendasve.
Edhe pjesa e dytë solli dominimin holandez. Jurrien Timber shënoi golin e gjashtë në minutën e 59-të, ndërsa vetëm dy minuta më vonë Donyell Malen vulosi rezultatin përfundimtar 7:0, pas asistimit të Dumfries.
Me 7 gola të shënuar dhe asnjë të pësuar, Holanda regjistroi një fitore spektakolare para tifozëve në Amsterdam, duke e kthyer këtë përballje në një mbrëmje për t'u mbajtur mend për tifozët portokalli.
