Adri Mehmeti është vetëm 17 vjeç, por tashmë konsiderohet një nga talentet më premtuese të futbollit amerikan. Mesfushori me prindër shqiptarë po shkëlqen te New York Red Bulls dhe ka debutuar edhe me Kombëtaren A të Shteteve të Bashkuara të Amerikës.
Në një intervistë për CNN Sports, Mehmeti shfaqet i buzëqeshur, i qetë dhe plot vetëbesim, cilësi që zakonisht i karakterizojnë futbollistët me përvojë.
Megjithatë, karriera e tij profesionale sapo ka filluar.
Pavarësisht moshës së re, ai është shndërruar në një titullar të rregullt te New York Red Bulls, ndërsa muajin e kaluar realizoi edhe ëndrrën e debutimit me Kombëtaren amerikane.
“Nuk e prisja që gjithçka të ndodhte kaq shpejt. Në fillim thosha: ‘Uau, kjo është e çmendur!’, sepse një vit isha në ekipin e dytë dhe vitin tjetër në ekipin e parë. Jam shumë mirënjohës ndaj trajnerëve dhe stafit që më kanë besuar. Çdo ditë po mësohem gjithnjë e më shumë me këtë nivel”, tha Mehmeti për CNN Sports.
Babai shqiptar, ndikimi më i madh në karrierën e tij
Të dy prindërit e Adri Mehmetit janë nga Shqipëria, një vend ku futbolli ka një rëndësi të jashtëzakonshme.
Babai i tij ka qenë gjithashtu futbollist dhe e ka përfaqësuar Shqipërinë në grupmoshat e reja.
Pikërisht ai ka luajtur rolin më të rëndësishëm në zhvillimin e talentit të të birit.
“Babai im është ndikimi më i madh në jetën time, brenda dhe jashtë fushës. Kam filluar ta godas topin me të që kur isha rreth dy vjeç. Luaja çdo ditë me të në oborrin e shtëpisë dhe kështu lindi dashuria ime për futbollin.”
Mehmeti tregon se edhe sot vazhdon të luajë me babanë dhe se pothuajse gjithmonë ka një top pranë vetes.
“Prindërit e mi kanë sakrifikuar shumë për mua. Kjo është një nga arsyet pse luaj edhe për ta. Sakrificat e tyre më motivojnë çdo ditë.”
Nga akademia te debutimi me Kombëtaren amerikane
Talenti i Mehmetit u dallua që në fëmijëri.
Në vitin 2019, kur ishte rreth 10 vjeç, ai iu bashkua akademisë së New York Red Bulls.
Me kalimin e viteve, mesfushori u zhvillua vazhdimisht dhe arriti të ngjitej në ekipin e parë.
Në shkurt, në moshën 16-vjeçare, bëri debutimin e tij profesional, ndërsa në prill shënoi golin e parë në MLS.
Paraqitjet e tij tërhoqën edhe vëmendjen e përzgjedhësit të SHBA-së, Mauricio Pochettino.
Mehmeti e kishte përfaqësuar më parë Shqipërinë në grupmoshat e reja, duke ndjekur gjurmët e familjes së tij.
Megjithatë, në shtator ai debutoi me Kombëtaren A amerikane, në fitoren 4-1 ndaj Perusë, duke hyrë në fushë në minutën e 88-të në vend të Tyler Adams.
“Niveli ishte jashtëzakonisht i lartë. Edhe gjatë stërvitjeve mund ta vëreje intensitetin dhe shpejtësinë e lojës. Ishte një përvojë fantastike.”
Ende nxënës, ndërsa në fushë luan si profesionist me përvojë
Edhe pse po zhvillon një karrierë të suksesshme, Mehmeti vazhdon shkollimin në distancë, duke i përshtatur mësimet me stërvitjet dhe ndeshjet.
Madje, ai ende nuk ka patentë shoferi dhe është nëna e tij ajo që e dërgon në stërvitje.
Jashtë futbollit, 17-vjeçari kalon kohën duke luajtur videolojëra dhe golf me bashkëlojtarët e tij.
Por futbolli mbetet gjithmonë prioriteti kryesor.
Ai kalon orë të tëra duke analizuar ndeshje, duke shikuar videot e paraqitjeve të veta dhe duke studiuar lojtarët më të mirë të botës.
“Përpiqem t’i analizoj çdo ditë edhe detajet më të vogla, sepse ato më ndihmojnë të përmirësohem qoftë edhe me 1%.”
Klubet evropiane po e ndjekin talentin shqiptar
Falë talentit dhe paraqitjeve të tij, Mehmeti raportohet se ka zgjuar interesimin e disa klubeve evropiane.
Megjithatë, për momentin ai është i lumtur te New York Red Bulls dhe mbetet i përqendruar në zhvillimin e tij.
Ai është pjesë e një gjenerate të re talentesh amerikane, së bashku me Cavan Sullivan, Julian Hall dhe Justin Ellis, të cilët shihen si e ardhmja e futbollit në SHBA.
Madje, Mehmeti zbulon se ka një grup në Snapchat me disa prej këtyre talenteve, ku mbështesin njëri-tjetrin dhe diskutojnë për ëndrrat e tyre.
Sfida e radhës e New York Red Bulls do të jetë përballë Inter Miamit të Lionel Messit, një tjetër mundësi e madhe për 17-vjeçarin me origjinë shqiptare që të tregojë cilësitë e tij.
Nga një fëmijë që luante futboll me babanë shqiptar në oborrin e shtëpisë, Adri Mehmeti tashmë po ndërton emrin e tij në futbollin ndërkombëtar!
