Sir Alex Ferguson ishte 99 % i sigurt se do të arrinte të bindte Cristiano Ronaldon që të kthehet në Old Traffod, disa javë para se të pensionohej.
Të paktën kështu ka thënë ish-futbollisti i tij, francezi Patrice Evra.
Sipas tij, Ferguson dëshironte kthimin e Ronaldos, por dëshironte që të transferonte edhe uellsianin Gareth Bale.
Në fakt, Evra ka thënë se Ronaldo e kishte konfirmuar se do të kthehej në Old Trafford.
Por pasi kjo përpjekje dështoi, vazhdon Evra, Ferguson u pensionua dy javë më vonë me lajm të hidhur.
“Dy javë para daljes në pension, mbaj mend që kishte shumë media që thoshin se Ferguson ndoshta do të dalë në pension vitin e ardhshëm, dhe ai më tha: ‘Patrice, nuk do të tërhiqem kurrë. Do të jem këtu edhe 10 vjet të tjera’”, ka thënë Evra për mediat angleze.
“Ai më pas më tha: ‘Unë jam 99 për qind i sigurt se do t’i kemi në ekip Cristiano Ronaldon dhe Gareth Bale. Mua më duhen vetëm këta dy lojtarë për të fituar përsëri Ligën e Kampionëve. Nëntëdhjetë e nëntë për qind’”, ka treguar Evra bisedën me ish-trajnerin e Manchester United.
