Ylli i Barcelonës, Ansu Fati, është bërë golashënuesi më i ri në historinë e ekipit kombëtar të Spanjës, pas golit që e shënoi në fitoren e thellë kundër Ukrainës në Ligën e Kombeve të dielën.
Fati u përfshi në dy gola në fitoren e Spanjës 4:0 kundër Ukrainës në stadiumin Alfredo Di Stefano.
Natyrisht, ata që më së shumti iu gëzuan golit të 17-vjeçarit, ishin familja që shpërthyen në festë në shtëpi ku ishin mbledhur për ta parë të veçantin e tyre duke luajtur me Spanjën.
Ansu e fitoi një penallti në fillim të takimit, të cilën në gol e shndërroi kapiteni Sergio Ramos.
Pas gjysmë ore lojë, adoleshenti doli në skenë. Ai e shënoi golin e parë në fanellën e Spanjës duke e mposhtur portierin e Ukrainës me një goditje nga largësia, pasi i trullosi dy mbrojtës fillimisht.
Me këtë gol, ai u bë lojtari më i ri që shënon për ekipin kombëtar, në moshën 17 vjeçare e 311 ditë.
Ky rekord mbahej nga Juan Errazquin, i cili kishte shënuar gol për Spanjën në moshën 18 vjeçare e 344 ditë, në një ndeshje kundër Zvicrës më 1925.
