Nuk ndodh mrekullia, Messi me shokë kthehen duarthatë, Liverpooli dhe PSG kualifikohen tutje
Kanë përfunduar tashmë dy ndeshjet kthyese të Ligës së Kampionëve ku u ballafaquan Liverpooli me RB Leipzigun dhe PSG me Barcelonën.
Barcelona nuk ka arritur ta bëjë mrekullinë radhës për ta përmbysur rezultatin ndaj gjigantit francez Paris – Saint – Germain duke barazuar 1-1 në ndeshjen kthyese dhe duke i thënë kështu lamtumirë garës më të rëndësishme të futbollit evropian në nivel klubesh, Ligës së Kampionëve.
Kylian Mbappe i dha epërsinë PSG-së nga penalltia, kurse Lionel Messi barazoi rezultatin 1-1 me një gol shumë të bukur. Ky i fundit e kishte rastin ta hapte edhe më shumë lojën, por nuk realizoi nga pika e bardhë në fund të pjesës së parë. Në fraksionin e dytë të ndeshjes nuk u realizua asnjë gol dhe kështu PSG-ja kaloi në çerekfinale të kësaj gare.
Nga ana tjetër, Liverpooli e ka mposhtur skuadrën gjermane RB Leipzig me rezultat 2-0 edhe në ndeshjen kthyese me golat e realizuara nga Salah dhe Mane në pjesën e dytë të ndeshjes duke siguruar kështu kalimin në çerekfinale të Ligës së Kampionëve me rezultat të përgjithshëm 4-0.
Deri më tani në çerekfinale të Ligës së Kampionëve janë kualifikuar Porto, Dortmund, PSG dhe Liverpooli.
