Përfaqësuesja e Kosovës në futboll ka zhvilluar stërvitjen e dytë në stadiumin “Fadil Vokrri” në Prishtinë, në prag të ndeshjeve të ardhshme kualifikuese për botërorin “Katari 2022”. Edhe në stërvitjen e dytë të “Dardanëve” kishte mungesa.
Kosova të hënën është grumbulluar për ndeshjet kundër Suedisë dhe Gjeorgjisë. Në stërvitjen e së martës pasdite munguan Lirim Kastrati dhe Bersant Celina. Për Celinën është thënë se do t’i bashkohet Përfaqësueses në stërvitjen e së mërkurës.
Po të mërkurën do të mësohet nëse Kastrati do të jetë i gatshëm për lojë, për shkak të një lëndimi.
Të martën janë bashkuar në stërvitje Milot Rashica, Florent Hadërgjonaj dhe Herolind Shala. Të tre futbollistët munguan në stërvitjen e mbajtur të hënën mbrëma.
Kosova luan të shtunën kundër Suedisë në udhëtim, ndërsa më 12 tetor luan në Prishtinë me Gjeorgjinë.
Ndryshe nga stërvitja e parë që u zhvillua me intensitet të ulët, puna të martën ishte me intensitet dukshëm më të lartë.
Stërvitja nisi me nxehje, ku futbollistët u shfaqën me humor të mirë. Më pas vazhdoi me një fjalim të zakonshëm të përzgjedhësit Bernard Chllandes në mes të fushës. Pasi Challandesi e mbaroi fjalimin, futbollistët vazhduan punën me ndihmësit, me përkushtim dhe me ritëm më të lartë.
Te Kosova i kanë vlerësuar të vështira dy ndeshjet e këtij muaji. Kosova e ka mposhtur Gjeorgjinë në udhëtim muajin e shkuar me rezultat 1:0, ndërsa ka humbur nga Suedia në Prishtinë me rezultat të thellë 3:0, në mars.
Te “Dardanët” kanë premtuar angazhim dhe sinjalet nga stërvitja ishin pozitive. Stërvitje në Kosovë, Përfaqësuesja do të mbajë edhe të mërkurën. Ndeshja me Suedinë luhet në Solna, kurse stadiumi pritet të jetë i mbushur me 50 mijë shikues.
Kosova është në vendin e katërt të Grupit B me katër pikë nga pesë ndeshje të zhvilluara.
