Trajneri Xabi Alonso ka kërkuar mbështetjeje nga tifozët e Bayer Leverkusenit për ndeshjen ndaj Salzburgut.
Të martën nga ora 21:00, Leverkuseni do të përballet me Salzburgun në kuadër të xhiros së pestë të Ligës së Kampionëve.
Alonso të hënën në konferencë për shtyp ka thënë se mbështetja e tifozëve mund të ndikojë në lojën e futbollistëve të Leverkusenit.
“Ne kemi nevojë për energji nga tifozët. Në momente të vështira ata mund të ndikojnë në lojën më të mirë të futbollistëve. Ne e dimë se sa të rëndësishme janë ndeshjet e ardhshme në shtëpi kundër Salzburgut dhe Interit. Ne presim një kundërshtar të mirë nesër. Salzburgu luan me shumë intensitet. Duam t’i marrim tri pikët shumë të rëndësishme”, ka thënë Alonso.
Mesfushori Granit Xhaka pritet të luajë nga minuta e parë në ndeshjen ndaj Salzburgut. Xhaka realizoi gol të bukur në fundjavë në fitoren e Leverkusenit ndaj Heidenheimit në Bundesligë.
