Shorti i Kupës së Mbretit që u mbajt sot (e hënë) përfshiu të gjitha skuadrat që mbetën në këtë garë ku tashmë ekipe si Barcelona dhe Real Madridi mësuan kundërshtarët e tyre. 

Barcelona, Real Madrid, Athletic Bilbao dhe Mallorca do të marrin pjesë në Superkupën e Spanjës në Arabinë Saudite dhe për këtë arsye nuk garuan në dy raundet e para. 

Raundi i 32-të do të luhet mes datave 4 dhe 5 janar, teksa raundi i 16-të pason 10 ditë më vonë me datë 15 janar. 

Ndeshjet çerekfinale janë paraparë që të luhen me 5 shkurt teksa ndeshjet e para dhe të dyta të gjysmëfinaleve do të luhen me 26 shkurt dhe 2 prill respektivisht. 

Barcelona për kundërshtar do ta ketë Barbastron, ekip që bën gara në kategorinë e katërt të futbollit spanjoll dhe eliminuan paraprakisht Espanyolin. 

Për blaugranasit ky nuk është një kundërshtar i panjohur pasi vitin e kaluar i kishin mposhtur pikërisht në këtë kompeticion me rezultat 3-1. 

Sa i përket kampionit në fuqi të Spanjës, Real Madrid, ata përballë do ta kenë Deportivo Mineiron, të cilët së fundmi eliminuan Alavesin pas ekzekutimit të penalltive. 

Njësoj si kundërshtari i Barçës edhe Deportivo Mineiro bën gara në kategorinë e katërt të futbollit spanjoll.

ARTIKUJ TË NGJASHËMMË SHUMË NGA AUTORI