Skuadra e Liverpoolit e ka fituar ndeshjen dramatike të dielën në mbrëmje ndaj Tottenham Hotspurit. U shënuan plot nëntë gola.
Liverpooli shënoi fitore 6:3 si mysafir ndaj Tottenhamit.
Katër gola u shënuan në pjesën e parë ndërsa pesë të tjerë në pjesën e dytë. Luis Diaz në minutën e 23-të i kaloi në epërsi mysafirët. Në minutën e 36-të Alexis Mac Allister i dyfishoi shifrat. Vendësit i ngushtuan shifrat pesë minuta më pas. James Maddison shënoi për 2:1.
Në minutën e parë shtesë të pjesës së parë Dominik Szoboszlai realizoi për 3:1.
Mohamed Salah në minutën e 54-t shënoi për 4:1. Shtatë minuta më pas Salah sërish realizoi për 5:1.
Dejan Kulusevski në minutën e 72-të e shënoi golin e dytë për Tottenhamin. Në minutën e 83-të Dominic Solanke shënoi për 5:3.
Dy minuta më pas Luis Diaz e shënoi golin përfundimtar të ndeshjes për 6:3.
Liverpooli mbetet lider me 39 pikë. Tottenhami ka 23 pikë dhe është në vendin e 11-të.
