Erling Haaland, Robert Lewandowski, Lionel Messi, Cristiano Ronaldo e Lamine Yamal, janë në qendër të vëmendjes për vitin 2025, sa u përket rekordeve që synojnë t’i thyejnë ata.
950
Cristiano Ronaldo mund të bëhet futbollisti i parë në histori që e arrin shifrën e 950 golave zyrtarë në karrierë. 39-vjeçari aktualisht i ka 916. Ronaldo ka shënuar 43 gola për Al Nassrin dhe Portugalinë në vitin 2024. Në vendin e dytë është Lionel Messi me 850 gola.
125
Endie Renard mund të bëhet futbollistja e parë që arrin shifrën e 125 paraqitjeve në Ligën e Kampionëve për futbolliste. 34-vjeçarja i ka 122 paraqitje, ndërsa me Lyonin është në çerekfinale. Renardi po synon që ta vazhdojë edhe rekordin me paraqitje në më së shumti finale, në 12 gjithsej. Ndërkohë, qendërmbrojtësja dhe bashkëlojtarja e saj, Eugenie Le Sommer, synon të bëhen të parat që e ngrenë lartë trofeun nëntë herë.
100
Erling Haaland është afër që ta thyejë rekordin për arritjen e 100 golave në Premier League në më së paku paraqitje. Ky rekord mbahet nga Alan Shearer me 124 paraqitje. Harry Kane e ka këtë rekord në 141 paraqitje, Sergio Aguero në 147, Thierry Henry në 160 dhe Mohamed Salah në 162 paraqitje. Norvegjezi i ka realizuar 77 gola në 85 paraqitje në këtë kampionat. Haalandi synon që ta thyejë edhe rekordin e Ruud van Nistelrooyt në Ligën e Kampionëve, pasi holandezi ka realizuar 50 gola në 62 paraqitje. 24-vjeçari i ka shënuar 46 gola në 45 ndeshje të luajtura.
55
Celticu pritet që ta barazojë rivalin e urryer, Rangersin, sa u përket titujve të fituar në Skoci. Rangersi i ka 55 tituj ndërsa Celticu 54. Pavarësisht se e ka humbur derbin “Old Firm” të enjten mbrëma, Celticu ka 11 pikë më shumë se skuadra e vendit të dytë pas 19 ndeshjeve të luajtura. Një sukses i tillë do të bënte që Celticu të barazohej me tituj me Rangersin për herën e parë që prej vitit 1930. Linfieldi i Irlandës së Veriut e mban rekordin botëror për tituj në liga me 56 në total. Në top-pesëshen botërore janë edhe ekipet uruguaiane, Penaroli me 52 tituj dhe Nacionali me 49.
50
Lionel Messi mund të bëhet futbollisti i parë në histori që fiton 50 trofe me skuadra. Messi ka 45 trofe të fituar, 34 me Barcelonën, gjashtë me Argjentinën, tre me Paris Saint-Germainin dhe dy me Inter Miamin. Inter Miami do të garojë në Kupën e Ligës, MLS, Kupën e Kampionëve për zonën CONCACAF dhe Kupën e Botës për Klube në vitin 2025. Argjentina do të luajë kundër Spanjës në “Finalissima”.
39
Legjenda e Guatemalës në futboll, Carlos Ruiz, ka shënuar 39 gola në kualifikimet për Kupën e Botës, por dy “mbretërit” e futbollit janë afër thyerjes së rekordit të tij. Cristiano Ronaldo i Portugalisë dhe Lionel Messi i Argjentinës, kanë shënuar 36 dhe 34 gola respektivisht.
25
17-vjeçarët Lamine Yamal dhe Kendry Paez – të cilët kanë luajtur si 17-vjeçarë me përfaqësueset e tyre, mund të bëhen futbollistët e parë që arrijnë shifrën e 25 paraqitjeve para moshës 19-vjeçare. Ekuadoriani, 18 vjet i mbush në fillim të muajit maj, ndërsa spanjolli do ta ketë të njëjtën moshë dy muaj më vonë. Sa për t’u krahasuar, Kylian Mbappe ishte 19-vjeçar, kurse Lionel Messi, Pele, Ronaldo dhe Cristiano Ronaldo, ishin 20-vjeçarë kur e arritën këtë shifër të paraqitjeve me shtetet e tyre.
14
Ludogoretsi do të bëhet vetëm klubi i katërt në histori që fiton 14 tituj rresht të ligës nëse e “pushton” Bullgarinë në edicionin 2024/25. Ekipi nga Razgradi ka 13 pikë më shumë se përcjellësi i parë. Ludogoretsi u inkuadrua në elitën bullgare për herën e parë në vitin 2011, por i ka fituar 13 kampionate më pas. Ekipet e vetme që kanë fituar më shumë tituj rresht janë Lincoln Red Impsi (14 tituj në Gjibraltar, ndërmjet viteve 2003 dhe 2016), Skonto Riga (14 në Letoni ndërmjet viteve 1991 dhe 2004), dhe Tafea në Vanuatu të Oqeanisë (15 prej vitit 1994 dhe 2004).
9
Robert Lewandowski mund ta barazojë Lionel Messin dhe të bëhet golashënuesi më i mirë në top pesë ligat evropiane të futbollit për herën e nëntë. Argjentinasi Messi e ka fituar këtë çmim tetë herë nga 19 sezonet e kaluara me Barcelonën dhe Paris Saint-Germainin, ndërsa polaku e ka regjistruar këtë sukses tetë herë në 14 kampanja me Borussia Dortmundin, Bayern Munichun dhe Barcelonën. Lewandowski ka pesë gola më shumë të shënuar sesa rivali më i afërt, bashkëlojtari te Barcelona, Raphinha. Të dy janë në garë për t’u bërë golashënuesit më të mirë të La Ligas në këtë edicion. Lojtarët që e kanë fituar këtë çmim mbi katër herë janë Gerd Muller (7), Jimmy Greaves (6), Kylian Mbappe (6), Telmo Zarra (6), Carlos Bianchi (5), Steve Bloomer (5), Alfredo Di Stefano (5), Gunnar Nordahl (5), Delio Onnis (5), Jean-Pierre Papin (5), Quini (5) dhe Hugo Sanchez (5).
3
Sarina Wiegman do ta barazonte rekordin për më së shumti triumfe në Kampionatet Evropiane për futbolliste, si trajnere, nëse e udhëheq Anglinë drejt suksesit në Zvicra 2025. Trajnerja që u lind në Hagë të Holandës, e ka udhëhequr Holandën dhe Anglinë drejt këtij suksesi, në vitet 2017 dhe 2022. Gero Bisanz (1989, 1991 dhe 1995), dhe Tina Theune (1997, 2001 dhe 2005), kanë fituar nga tre tituj kur e kanë udhëhequr Gjermaninë.
