Goli i sulmuesit Hekuran Berisha në minutën e dytë të kohës shtesë ka bërë që Dukagjini ta shmang disfatën nga Drita, që është lidere e elitës së futbollit kosovar.
Drita që sigurt po shkon drejt një tjetër titulli në elitë, ishte afër që të merrte pikët e plota nga stadiumi “18 Qershori” në Klinë të shtunën.
Por ndeshja e xhiros së 25-të e elitës së futbollit kosovar, u mbyll baras, 1:1.
Drita ishte në epërsi prej minutës së 39-të.
Ukrainasi Denys Kostyshyn që u zyrtarizua si futbollist i Dritës në mesin e muajit shkurt, shënoi për 1:0 në të mirë të Dritës, me asistim të Iljasa Zulfiut.
Menjëherë pas golit të shënuar nga Drita, trajneri i Dukagjinit, Ismet Munishi, u përjashtua nga loja me të kuq nga gjyqtari Visar Kastrati.
Raste për shënim pati nga të dyja skuadrat edhe në pjesën e dytë, por barazimi erdhi pak para se të mbyllej e tërë ndeshja.
Berisha shënoi nga afërsia dhe ia siguroi një pikë të madhe Dukagjinit që po lufton për mbetje në elitë.
Dukagjini është pa humbje në tri ndeshjet e fundit në Superligë, pas fitoreve ndaj Malishevës e Prishtinës.
Drita pavarësisht barazimit, vazhdon të jetë lidere e me diferencë të madhe të pikëve nga vendi i dytë.
Drita ka 54 pikë në vendin e parë, ndërsa Ballkani në vendin e dytë ka 43 pikë.
Dukagjini në vendin e shtatë mbetet me 31 pikë në 25 ndeshje, dy më shumë se Suhareka që është në vendin e tetë, përkatësisht atë të barazhit.
Suhareka e ka një ndeshje më pak të luajtur.
Dramë në fundin e ndeshjes në Klinë
Hekuran Berisha ka shënuar gol nga afërsia dhe e ka barazuar rezultatin për Dukagjinin ndaj Dritës.
Ndeshja u mbyll me rezultat 1:1. Ai realizoi në minutën e 92-të.
