Mbrëmja e Ligës së Kampionëve dhuroi emocione të forta me sfida të zjarrta në fazën e 1/8 së finales, ku disa skuadra siguruan fitore të rëndësishme, ndërsa të tjera u përballën me momente të vështira.
Interi siguroi një fitore të pastër 2-0 në fushën e Feyenoordit, falë golave të Marcus Thuram (38′) dhe Lautaro Martinez (50′), duke marrë një avantazh të rëndësishëm për ndeshjen e kthimit në San Siro. Piotr Zielinski pati mundësinë të ngushtonte diferencën për vendasit, por humbi një penallti në minutën e 65-të.
Barcelona, ndonëse mbeti me një lojtar më pak që në minutën e 22-të, pas përjashtimit të Pau Cubarsit, arriti të dalë me një fitore minimale 1-0 ndaj Benficës falë një goli të Raphinhas (61′). Katalanasit treguan karakter në Lisbonë dhe tani kanë avantazhin për ndeshjen e kthimit në Camp Nou.
Në një nga sfidat më të pritura, Bayern Munchen dominoi ndaj Bayer Leverkusen, duke fituar 3-0 falë golave të Harry Kane (9′, 75′) dhe Jamal Musiala (54′). Kapiteni i Zvicrës, Granit Xhaka, u paraqit për Leverkusenin, por nuk mundi të ndalë furinë e bavarezëve.
Ndërkohë, Liverpooli siguroi një fitore të madhe në sekondat e fundit ndaj PSG-së në “Parc des Princes”. Harvey Elliott, i cili hyri në lojë në minutën e 86-të, shënoi golin e vetëm të ndeshjes një minutë më vonë, duke i dhënë The Reds një avantazh të madh për ndeshjen e kthimit në Anfield. PSG dominoi lojën, por portieri Alisson Becker bëri disa pritje vendimtare për të mbajtur portën e tij të paprekur.
Me rezultate të ngushta dhe ndeshje të hapura për kthim, Champions League vazhdon të dhurojë spektakël dhe emocion, me ekipe që synojnë çerekfinalet në garën më prestigjioze evropiane.
