Llapi dhe Ballkani kishin synime të kundërta para ndeshjes së zhvilluar të shtunën në stadiumin “Zahir Pajaziti” në Podujevë.
Llapit i duhej fitorja për t’i ikur zonës së rrezikshme, ndërsa Ballkani kërkonte trepikëshin për të mbetur në garë për titull.
Por, sfida e zjarrtë e xhiros së 26-të u mbyll baras, 1:1, ndërsa kampioni i tri edicioneve të fundit në Kosovë e shmangu disfatën në minutat shtesë.
Për Llapin ishte barazimi i parë pas fitores ndaj Suharekës në xhiron e kaluar, ndërsa Ballkani barazoi pas fitores ndaj Ferizajt.
Ishte vetëm barazimi i dytë për suharekasit në vitin 2025 në Superligë, që kanë edhe tri humbje e po aq fitore.
Ardit Tahiri e shënoi golin për skuadrën e Llapit në pjesën e parë.
Pas penalltisë së shkaktuar nga mbrojtësi Geralb Smajli në Arbër Bytyqin, ekzekutimin e 11-të metërshit e mori përsipër sulmuesi Tahiri, i cili realizoi me gjuajtje të saktë në minutën e 28-të.
Prej atij momenti gola nuk pati më deri në minutat shtesë, ndonëse rastet ishin të shumta për të dyja skuadrat.
Ballkani i trajnerit Orges Shehi nuk u dorëzua dhe e kërkoi me ngulmim golin për 1:1. Atë e arriti në minutën e 91-të me sulmuesin Sunday Adetunji.
Llapi me këtë barazim mbetet me 30 pikë në vendin e nëntë, përkatësisht të parafundit. Para Llapit janë Suhareka në vendin e shtatë dhe Dukagjini në vendin e tetë, të barazhit, me nga 32 pikë.
Ballkani i dyti ka 44 pikë, por ka mbetur shumë prapa në garën për titull. Drita e Gjilanit është lidere dhe ka 13 pikë më shumë se skuadra nga Suhareka.
Deri në fund të kampionatit kanë mbetur edhe 10 xhiro për t’u luajtur.
Ndonëse Llapi ka mbetur prapa në tabelën e Superligës, është ende në garë për të triumfuar në Kupën e Kosovës. Në gjysmëfinale takohet me Drenicën. Gjysmëfinalja tjetër është Prishtina – Drita. Ndeshjet e para të gjysmëfinaleve zhvillohen më 9 prill, ndërsa ato kthyese më 23 prill.
