Edon Zhegrova ka pasur ndeshje të shkëlqyera në vjeshtë, por nuk është duke luajtur që nga mesi i dhjetorit. Rrjedhimisht ishte mungesë e rëndësishme e Kosovës në dy ndeshjet me Islandën.
Edhe pa lojtarin më të mirë të edicionit 2024/2025, Kosova arriti sukses historik, ndoshta më të madhin deri më tani. E mposhti në dy ndeshje Islandën dhe avancoi në Ligën B të Ligës së Kombeve. Deri më tani ishte në Ligën C.
Pos në Zhegrovën, selektori Franco Foda nuk ka mundur të llogarisë edhe në disa lojtarë të tjerë të rëndësishëm. Disa munguan në të dy ndeshjet e disa vetëm në ndeshjen e dytë, të zhvilluar të dielën në Murcia.
Dhe paraqitja e fitorja bindëse, 3:1, në Spanjë, dëshmon se Kosova tashmë ka opsione të bollshme në të gjitha pozitat. Në të kaluarën nuk ishte kështu. Mungesa e një lojtari të rëndësishëm, vështirë mbulohej.
Selektori Foda nuk ka mundur të llogarisë as në Muharrem Jasharin e suspenduar. Jashari në ndeshjet e kaluara u paraqit fuqishëm dhe do të ishte kandidat serioz për të luajtur ndaj islandezëve. Fisnik Asllani e Florent Hadërgjonaj ishin në listë, por u lënduan në ndeshjet e fundit me skuadrat e tyre para grumbullimit të Kosovës. Hadërgjonaj është vazhdimisht kandidat për mbrojtës të krahut, ndërsa Asllani me formën që e ka pasur do të ishte opsion për sulm. Natyrisht, pas Vedat Muriqit të pazëvendësueshëm. 22-vjeçari Asllani i ka 12 gola e gjashtë asistime në 25 paraqitje në Bundesliga 2 të Gjermanisë për skuadrën Elversberg. Ka munguar edhe i riu Eliot Bujupi, që ende po e fiton besimin në përfaqësuese.
Në fitoren 2:1 në Prishtinë, Kosova luajti me Aro Muriqin në portë, Amir Rrahmanin, Lumbardh Dellovën, Mërgim Vojvodën e Leart Paqaradën në mbrojtje, Elvis Rexhbeçajn e Valon Berishën në qendër të mesfushës, Ermal Krasniqin, Milot Rashicën e Donat Rrudhanin si lojtarë më të avancuar dhe me Vedat Muriqin në krye të sulmit.
Rrudhani u zëvendësua me Emir Sahitin, Berisha me Vesel Demakun, e ndërkohë edhe Vojvoda me Fidan Alitin, Muriqi me Albion Rrahmanin dhe Rashica me Lindon Emërllahun.
Berisha ishte i suspenduar për ndeshjen e dytë, ndërsa për shkak të lëndimeve munguan portieri Muriq dhe Rrudhani.
Në portë u vendos Amir Shaipi, që bëri një pritje të bukur në pjesën e dytë. Mbrojtja mbeti e pandryshuar, ndërsa Demaku zuri vendin e Berishës në mesfushë. Vendin e Rrudhanit si sulmues krahu e zuri Florent Muslija.
Në pjesën e dytë rastin e fituan Emërllahu, Sahiti, Ilir Krasniqi, Rrahmani dhe debutuesi Dion Gallapeni.
Jo të gjithë kanë pasur ndeshjen më të mirë. Jo të gjithë kanë bindur. Por mungesat e rëndësishme nuk janë vërejtur. Dhe paraqitja në ndeshjen e dytë ishte më e mirë se në të parën.
Rrahmani e Dellova tashmë janë të pazëvendësueshëm në mbrojtje, por ka edhe opsione të tjera për qendër të mbrojtjes. Mesfusha funksionon rreth Rexhbeçajt e sulmi nuk mendohet pa Muriqin. Për pozitat e tjera ka opsione me cilësi të përafërt, që nuk ishte më parë, ndonëse jo të gjithë janë në momentin më të mirë në klubet e tyre.
“Shihet qartë që ekipi është zhvilluar shumë mirë gjatë javëve dhe muajve të fundit. Tani kemi një grup të mirë prej 20-25 lojtarësh. Kishim shumë mungesa, por tashmë çdo lojtar mund të zëvendësohet dhe kjo e karakterizon ekipin tonë. Tani duhet thjesht të vazhdojmë përpara dhe të marrim këtë shpirt ekipor edhe në qershor”, ka thënë selektori Foda.
Selektori Franco Foda e ka edhe grumbullimin e qershorit për të bërë prova të ndryshme. Në qershor do të luhet të paktën një miqësore. Prej shtatorit, kur nisin kualifikimet për Botërorin 2026, do të luajnë vetëm më të mirët. Tifozët e Kosovës urojnë që trajneri gjerman të ketë telashe për të zgjedhur ekipin më të mirë prej lojtarëve të shumtë që luajnë e shkëlqejnë në klubet e tyre e jo të detyrohet të aktivizojë lojtarë që nuk janë në formë e që nuk kanë stabilitet në klube. Grumbullimi i marsit jep arsye për optimizëm.
