Max Kruse 37-vjeçar ka mësuar se pasuria mund të jetë bekim dhe mallkim.
Sidomos gjatë kohës së tij si futbollist profesionist, por edhe pas pensionimit nga futbolli aktiv, ish-reprezentuesit të Gjermanisë dhe disa skuadrave të njohura i janë kërkuar para borxh nga ata që i konsideronte shokë. Dhe Kruse, natyrisht se në shumiëcën e rasteve u ka dhuruar shuma të ndryshme të parave.
“U kam huazuar para shumë njerëzve në jetën time. Dhe asnjëherë nuk i kam marrë prapa. Nëse do të mi kthenin përsëri gjithë paratë e huazuara në jetën time, padyshim se do t’i kisha prej 250 mijë deri në 300 mijë euro. Kam pasur bashkëlojtar te Werderi të cilit i kam dhënë 70 mijë euro dhe i prisja sepse ishte lojtar profesionist i Bundesligës. Por ai i shpenzoi në kumar dhe nuk mi ktheu. Edhe te Gladbachu i kam dhënë njërit lojtar 12 mijë euro për t’i paguar disa borxhe, por ai bleu veturë”, ka deklaruar Kruse për emisionin “Flatterball”, shkruan “Bild” të premten.
Kruse si lojtar aktiv ka luajtur edhe te St. Pauli, Freiburgu, Wolfsburgu, Fenerbahçe, Union Berlini e Paderborni.
Tani është pjesë e skuadrës Hollywood United në “Baller League”, që është ligë e futbollit të vogël.
