Mesfushori Edvin Kuç ishte prej më meritorëve që Ballkani dominoi për shumë vjet rresht në futbollin kosovar. Tek ekipi suharekas, futbollisti punëtor luajti nga viti 2019 e deri në verën e vitit të kaluar. Ai u prit shumë mirë te Ballkani dhe në Kosovë në përgjithësi.
Për paraqitjet e mira te Ballkani, Kuç mori shpërblimin. U bë reprezentues i Malit të Zi. Prej vjeshtës së vitit 2023 ftohet rregullisht. Më herët nuk ishte ftuar asnjëherë. 31-vjeçari tashmë i ka katër gola në 13 paraqitje.
Golin më të rëndësishëm e shënoi të martën mbrëma. Realizoi për fitoren 1:0 të Malit të Zi ndaj Ishujve Faroe. Ndeshja në Nikshiq u takoi kualifikimeve për Kupën e Botës 2026. Kuçi në lojë hyri në fillim të pjesës së dytë, ndërsa golin e fitores dhe të festës së madhe e shënoi fare në fund, në minutën e 96-të.
“Kuç sërish hyri në lojë shumë mirë në pjesën e dytë, njëjtë si kundër Gjibraltarit. Bëhet fjalë për një djalosh që ka kualitet dhe që na solli tri pikët”, ka thënë selektori i Malit të Zi, kroati i njohur Robert Prosineçki.
Kuç, që ishte përfolur edhe si opsion për të luajtur për Kosovën para se të ftohej nga Mali i Zi, tani po luan me sukses në Azerbajxhan.
Mali i Zi javën e kaluar fitoi 3:1 ndaj Gjibraltarit dhe ish-lojtari i Ballkanit la përshtypje të mira po ashtu. Mali i Zi e ka në grup edhe Kroacinë dhe Çekinë, me të cilat përballet më vonë.
Kuç ka përmendur edhe Ballkanin në prononcimin pas ndeshjes.
“Është një prej momenteve më të bukura në karrierën time. Një ditë e mirë për të gjithë ne. E kemi ditur se nuk do të jetë lehtë të fitojmë gjashtë pikë. Por kemi nisur me dy fitore, falë Zotit. Në grumbullimin e radhës luajmë me Çekinë, që ndoshta është rivali ynë kryesor për të avancuar tutje. Unë kam dëshirë të përfshihem nga plani i dytë. E kam ditur se nuk do të jetë lehtë. Kam thënë edhe më parë që dy vjet më herët kam pasur rast që me Ballkanin tim të luaj kundër Klaksvikut të Ishujve Faroe dhe tani të gjithë luajnë futboll. E kam ditur se Ishujt Faroe kanë ekip të mirë, por kemi dominuar dhe nuk kemi luajtur shumë ndërprerje që është arma kryesore e lojtarëve të Ishujve”, ka thënë Kuç.
Driton Camaj luajti po ashtu në pjesën e dytë për Malin e Zi dhe u shqua me paraqitje.
