Derisa Paris Saint-Germaini po shkon drejt një tjetër titulli në Francë, gara për vendin e dytë vazhdon të mbetet e hapur.
PSG-ja është e para me 68 pikë. Vendin e dytë aktualisht e ka Marseille që ka mbetur shumë prapa, me 49 pikë.
PSG-ja në kuadër të xhiros së 27-të të kampionatit francez do të luajë në udhëtim te St. Etienne, të shtunën nga ora 19:00. Marseille në po të njëjtën ditë nga ora 17:00 luan te Reimsi. Reimsi është pa fitore në ligë prej muajit nëntor, ndonëse kishte katër fitore e dy barazime në shtatë ndeshjet e para.
Rivalët, Monaco dhe Nice, janë larg vetëm 20 kilometra, por në ligë kanë pikë të barabarta, nga 47, dhe pritet të zhvillohet tjetër ndeshje e zjarrtë mes tyre. Monaco – Nice zhvillohet të shtunën nga ora 21:05.
PSG-ja do t’i afrohej edhe më shumë titullit nëse realizon tjetër fitore në këtë fundjavë. Parisienët po kalojnë formë të mirë dhe nuk kanë pësuar ende humbje në edicionin aktual. Kanë 21 fitore e pesë barazime, 73 gola të shënuar e 25 të pranuar. PSG-ja është edhe në çerekfinale të Ligës së Kampionëve. Do të ballafaqohet me Aston Villan. Skuadra e udhëhequr nga trajneri Luis Enrique pritet që shpejtë ta fitojë edhe titullin e 13-të në Francë, që është rekord.
Me 10 tituj është St-Etienne, kurse Marseille i ka nëntë tituj.
