Kur e largoi Megzon Visokën, Drenica nuk kishte asnjë humbje në tetë ndeshjet e para të edicionit, si asnjë skuadër tjetër në Superligë dhe në Ligën e Parë.
Visoka e kishte lënë skuadrën në vendin e dytë në Grupin A të Ligës së Parë me 18 pikë, një pikë më pak se Vëllaznimi e një më shumë se Trepça.
Nga posti i trajnerit Visoka ishte larguar më 8 tetor, me arsyetimin se “kryesia e klubit, pas analizës së performancës sportive dhe rrjedhës së deritashme të kampionatit, ka arritur në përfundim se klubi nuk është në rrugën e dëshiruar dhe ka kërkuar që të ndërpresim bashkëpunimin”.
Një ditë pasi largoi Visokën, më 9 tetor, Drenica emëroi Bylbyl Sokolin shef të shtabit teknik. Dhe e liroi nga detyra më 11 dhjetor. Me trajnerin Sokoli, Drenica e mbylli stinorin vjeshtor në vend të parë në Grupin A të Ligës së Parë. Në njoftim thuhej se “ky vendim është marrë pas njoftimit të Sokolit, i cili ka vendosur të angazhohet në garën politike. Vendimi është rezultat i angazhimit të klubit për të ruajtur paanësinë dhe për të shmangur çdo ndikim të mundshëm politik në aktivitetet tona sportive”.
Nuk vonoi shumë dhe besimin për ta udhëhequr ekipin, kryesia e Drenicës ia dha Arsim Thaqit.
Saktësisht më 13 dhjetor Thaqi mori drejtimin e kuqezinjve. Të martën Drenica e liroi Thaqin, “pas një analize të detajuar të ecurisë së ekipit dhe nevojës për ndryshime që do të ndihmojnë në arritjen e objektivave tona për të ardhmen”.
Thaqi u shkarkua një ditë pasi humbi derbin ndaj Trepçës ’89.
Të hënën pasdite në Skenderaj, ekipi mitrovicas fitoi me rezultatin 2:0, në kuadër të xhiros së 20-të.
Drenica është lidere me 41 pikë. Trepça ’89 me fitore doli në vendin e dytë me 37 pikë. Nga 36 pikë i kanë Vëllaznimi e Liria, ndërsa Trepça është e pesta me 34 pikë.
Kryetari i klubit, Haxhi Rreci, ka theksuar se barazimi ndaj Mitrovicës dhe humbja nga 89-shi, kanë bërë që Thaqi të shkarkohet.
“Është shkarkuar puna e rezultateve, pas barazimit me Mitrovicën dhe humbjes nga Trepça ’89. Ne nuk e vëmë në diskutim ngritjen në Superligë. Do të jemi në Superligë, por po pretendojmë ta fitojmë edhe Kupën e Kosovës”, ka thënë Rraci për KOHËN të martën.
Ai ka bërë të ditur se Drenica të mërkurën do ta prezantojë trajnerin e ri.
“Do të jetë befasi për të gjithë”, ka theksuar Rraci.
Se a do të mbyllë Drenica edicionin me trajnerin e katërt, kjo mbetet të shihet.
Drenica në vitet e fundit ka ndërruar shpesh edhe drejtuesit.
