Barcelona nuk e ka kapacitetin financiar për t’i regjistruar sulmuesit Dani Olmo dhe Pau Victor, ka thënë La Liga, shkruan të mërkurën “BBC”.
Skuadrës nga Katalunja iu dhanë licenca të përkohshme nga La Liga për regjistrimin e Olmos dhe Victorit në verën e vitit të kaluar.
Por regjistrimi i tyre më pas u hoq në muajin janar nga La Liga, që tha se Barcelona ka dështuar që ta dëshmojë deri më 31 dhjetor se ishin në përputhje me rregullat financiare të ligës.
Pas apelit, Këshilli sportiv i Spanjës i dha Barcelonës lejen e përkohshme për t’i kthyer Olmon e Victorin, ndërsa vendimi përfundimtar për regjistrimin e tyre duhet të bëhet deri më 7 prill.
Barcelona, që është në krye të La Ligas dhe në çerekfinale të Ligës së Kampionëve, njoftoi se ka arritur marrëveshje për shitjen e ulëseve VIP të stadiumit “Camp Nou”, që është duke u rindërtuar, në mënyrë që ta ngritë fondin e 100 milionë eurove.
Por, La Liga thotë se marrëveshja nuk ishte regjistruar në llogaritë e dorëzuara nga Barcelona javën e kaluar për sezonin 2024-25, dhe se marrëveshja është pranuar nga një auditor tjetër, pa emër.
26-vjeçari Olmo u transferua në verën e vitit të kaluar për 55 milionë euro nga Leipzigu, ndërsa në edicionin aktual ka realizuar tetë gola e pesë asistime.
Ndërkohë, produkti i Akademisë së Barcelonës, 23-vjeçari Victor, ka luajtur në 22 ndeshje në këtë edicion, ndërsa kontributi i tij ka qenë me dy gola e një asistim.
