Sulmuesi i Kosovës, Vedat Muriqi, ka kërkuar nga Mallorca t’ia zgjasë kontratën edhe për dy vjet. Muriqi, i cili këtë muaj mbush 31 vjet, dëshiron të jetë pjesë e Mallorcas të paktën deri në moshën 35-vjeçare. Ai me Mallorcan ka kontratë deri në vitin 2027.
Muriqi është një nga lojtarët më të paguar te klubi spanjoll, me pagë vjetore mbi katër milionë euro.
Sulmuesi tashmë ka shprehur publikisht dëshirën në disa raste për t’u pensionuar në ishull dhe po i kërkon klubit që ta dëshmojë besimin me një kontratë afatgjate, shkruan “okdiario.com” të mërkurën.
Vendimin për vazhdimin e kontratës duhet të marrë drejtoria sportive, udhëhequr nga Pablo Ortells.
Muriqi po kërkohet nga klube të ndryshme në Evropë, veçanërisht nga klubet e Turqisë, ku ka luajtur para se të transferohej në Lazio. Disa klube janë duke përgatitur ofertë për kosovari, por tani për tani sulmuesi ka prioritet qëndrimin në Mallorca.
Muriqi i mungoi Mallorcas në humbjen 1:0 nga Valencia në fundjavë. Ai mungoi shkaku i problemeve fizike. Por shtatlarti ka stërvitur bashkë me pjesën tjetër të lojtarëve të Mallorcas dhe do të jetë në dispozicion të trajnerit Jagoba Arrasate për ndeshjen ndaj Celta Vigos, të shtunën. Ndeshja Mallorca – Celta Vigo i takon xhiros së 30-të të La Ligas.
Muriqi është golashënuesi më i mirë i skuadrës me shtatë gola, ndërsa në total ka 35 gola që kur nisi të luajë për Mallorcan.
