Ky është momenti i pabesueshëm kur një gjyqtar godet me një goditje karateje në fytyrë një anëtar të stafit teknik të ekipit humbës gjatë një ndeshjeje të ligës peruviane, duke e rrëzuar në tokë.
Luis Alegre goditi fuqishëm me këmbën e djathtë ndërsa burri u fut në fushë dhe vrapoi drejt tij me qëllim të dukshëm për ta sulmuar, duke mbajtur në dorë një shishe plastike.
Ai e goditi drejt në kokë kundërshtarin e tij, duke e rrëzuar në tokë dhe duke shkaktuar menjëherë ndërhyrjen e policisë, para se situata të përkeqësohej edhe më shumë, ndërsa gjyqtari dhe asistentët e tij u rrethuan nga lojtarë të zemëruar që kërkonin hakmarrje.
Drama ndodhi në minutën e 82-të të ndeshjes së Sport Huaquilla ndaj Magdalena CEDEC, në kuadër të Copa Peru, në Ancash, në veri të kryeqytetit Lima.
Pamjet televizive tregojnë se gjithçka ndodhi pasi z. Alegre nxori kartonin e kuq, pasi një nga asistentët e tij dukej se kishte sinjalizuar drejt dikujt nga pankina e Magdalenës.
Videoja tregoi se gjyqtari guximtar nuk ishte aspak fillestar në arte marciale — këmba e djathtë e tij u përplas drejtpërdrejt me nofullën e personit të paidentifikuar që vrapoi drejt tij për ta goditur me shishe.
Mrekullisht, Luis arriti të mbante në dorën e majtë kartonin e kuq, edhe pse reagoi me shpejtësi ndaj sulmit që po i vinte.
Asistenti më i afërt vrapoi drejt situatës për të mbrojtur kolegun, por më pas përpiqej të qetësonte gjakrat në pjesë të tjera të fushës, pasi situata po dilte nga kontrolli.
Personi që mori goditjen e fuqishme u ngrit disa çaste më vonë, i hutuar — dhe për fat të tij, një nga lojtarët e skuadrës e bindi të mos reagojë, duke e përqafuar dhe larguar nga vendngjarja.
Komentatorët e ndeshjes reaguan duke thënë (kur ishte tashmë shumë vonë):
“Qetësohuni djem, qetësohuni…”
Më pas shtuan teksa ndërhynte policia:
“Këto gjëra nuk duhet të ndodhin.”
Ndeshja u pezullua pas incidentit.
Nuk është bërë menjëherë e ditur nëse personi i goditur në fytyrë është dërguar në spital, apo nëse ai dhe gjyqtari do të përballen me ndonjë masë disiplinore.
