Ka bërë bujë humbja e Bayer Leverkusenit nga Arminia Bielefeldi, në gjysmëfinale të Kupës së Gjermanisë në futboll. Por bujë bëri edhe diskutimi i zjarrtë që Granit Xhaka kishte me tifozët e Leverkusenit, sidomos me njërin prej tyre.
Kampioni në fuqi i Gjermanisë dhe fituesi në fuqi i Kupës së Gjermanisë, u mposht të martën mbrëma në Bielefeld me rezultatin 2:1, nga skuadra e kategorisë së tretë gjermane. Humbja u vlerësua turpëruese, ndërsa u përjetua rëndë nga të gjithë te Leverkuseni. Pra edhe nga tifozët.
Pas ndeshjes kamerat kanë zënë momentin kur Xhaka ka diskutuar ashpër me tifozin. Xhaka ia ka drejtuar gishtin atij, derisa të dy ishin fare pranë. Edhe tifozi ka drejtuar gishtin kah Xhaka derisa vazhdonte diskutimi jo i lehtë.
Pas ndeshjes Xhaka nuk u deklarua.
Ka folur të mërkurën pasdite për gazetën e madhe zvicerane, “Blick”. Kapiteni i Zvicrës ka thënë se e tëra kishte të bënte me mbrojtjen e ekipit. Diskutimi ndodhi në tribunë dhe kjo është dëshmi që Xhaka ishte shumë i nervozuar.
“Natyrisht, mund të na kritikoni, por ka të bëjë me mënyrën se si bëhet kjo”, ka thënë Xhaka për “Blick”.
Rreth 3500 tifozë i kishte Leverkuseni me vete. Stadiumi ishte i stërmbushur, ndërsa disa prej tifozëve kanë reaguar dhunshëm. Derisa po e zhvillonte debatin e ashpër, Xhaka ishte i shoqëruar nga shefi i sigurisë së Bayer Leverkusenit, Ayhan Goevercin.
“Ishte e qartë për mua se prioriteti kryesor për mua do të jetë ta mbroj ekipin”, ka thënë Xhaka në fund të udhëtimit emocional që përfundoi si më keq për skuadrën kampione të Gjermanisë.
Drejtori sportiv i Leverkusenit, Simon Rolfes ishte po ashtu dëshmitar i skenës së vështirë.
“Ne të gjithë jemi të dëshpëruar. Natyrisht kemi menduar se do të përfundojë ndryshe. Kjo ndikon te të gjithë ne. Jo vetëm te tifozët”, ka thënë ai për ARD.
Leverkuseni ka mbetur vetëm në garë për titull të Gjermanisë. Por është gjashtë pikë prapa Bayern Munichut. Pas një edicioni historik, Leverkuseni po ka telashe që të jetë sërish klubi kryesor në Gjermani.
