Qendërmbrojtësi i Kosovës, Albian Hajdari, ka deklaruar se është mirë me shëndet, pas lëndimit që pësoi në ndeshjen ndaj Turqisë të martën mbrëma.
Hajdari e la ndeshjen në minutën e 80-të pas gjakosjes në kokë, nga një goditje me këmbë të paqëllimshme nga Vedat Muriqi.
Ai fillimisht u përpoq të luante me fashë në kokë, por më pas kërkoi zëvendësimin.
“Faleminderit shumë për mbështetjen dhe për mesazhet e bukura. Unë jam mirë, faleminderit”, ka shkruar ai në Instagram, ku ka postuar edhe një fotografi me fashë në kokë.
Kosova pësoi 1:0 nga Turqia në finalen e plejofit për kualifikim në Botëror.
Mbrojtësi i Hoffenheimit është prej më meritorëve për rrugëtimin e Kosovës.
