Kosova po bëhet gati për tri ndeshjet e nëntorit të cilat edhe janë të fundit për këtë vit.
Përfaqësuesja jonë të mërkurën ndeshet në një miqësore me Shqipërinë e cila zhvillohet në “Elbasan Arena” nga ora 16:00.
Padyshim muaji tetor ishte zhgënjyes për Kosovën e cila u eliminua në gjysmëfinale të Ligës së Kombeve nga Maqedonia e Veriut, derisa kritikat më të mëdha i morën lojtarët Vedat Muriqi, Amir Rrahmani e Milot Rashica që munguan në atë sfidë për shkak të lëndimeve dhe situatës me pandemi.
Gjithsesi, Muriqi i është bashkuar Kosovës për tri ndeshjet e nëntorit dhe sot ka shkruar në “Facebook” para ndeshjes me Shqipërinë duke u shprehur i lumtur që është grumbulluar.
“Jam i lumtur që, pas një kohe të gjatë, nesër do të jem në fushën e blertë.Gjithmonë, përballjet më të veçanta janë ato me Shqipërinë. Edhe pse zyrtarisht quhet “ndeshje miqësore”, ne e konsiderojmë ndeshje vëllazërore”, ka shkruar Muriqi.
