Një histori e pazakontë dhe shqetësuese po vjen nga Franca, ku emri i Kylian Mbappés është shfaqur në një hetim për një rrjet të dyshuar kriminal që planifikonte grabitje dhe rrëmbime të personave të pasur dhe të njohur.
Sipas raportimit të gazetës franceze “Le Parisien”, ylli i Real Madridit dhe kapiteni i Francës ishte një prej 26 personave që dyshohet se ishin identifikuar si objektiva të mundshëm.
Në qendër të hetimeve është një 18-vjeçar, i identifikuar si Clément L., i cili në komunikimet online dyshohet se përdorte pseudonimin “Lester Z”. Hetuesit dyshojnë se ai kishte rol në organizimin e një serie grabitjesh dhe planesh për rrëmbime, madje duke komunikuar me bashkëpunëtorë edhe gjatë kohës që ndodhej në paraburgim.
Rasti nisi të zbardhej pas hetimit të një grabitjeje ndaj një tregtari të orëve luksoze në Paris. Në prill, persona të maskuar si shpërndarës kishin tentuar të hynin në shtëpinë e tij, ndërsa disa ditë më vonë dy persona të armatosur grabitën dyqanin e tij dhe morën ora luksoze me vlerë të konsiderueshme.
Hetimet e policisë çuan te i dyshuari 18-vjeçar, ndërsa gjatë kontrollit të telefonave të sekuestruar autoritetet raportohet se gjetën informacione dhe adresa që lidhen me 26 objektiva të mundshëm.
Në mesin e tyre kishte biznesmenë, tregtarë, persona të njohur nga industria e muzikës dhe figura të tjera me pasuri të konsiderueshme. Emri më i njohur në listë ishte ai i Kylian Mbappés.
Sipas raportimeve, hetuesit po shqyrtojnë disa raste dhe plane që dyshohet se janë zhvilluar nga prilli deri në gusht të këtij viti.
Megjithatë, deri më tani nuk ka indikacione se është bërë një tentativë konkrete për rrëmbimin e Mbappés. Përfshirja e emrit të tij në materialet e sekuestruara tregon se ai konsiderohej një objektiv i mundshëm, por jo se një operacion për rrëmbimin e tij kishte hyrë në fazën e ekzekutimit.
Clément L. u arrestua më 19 gusht dhe dy ditë më vonë u akuzua në Nanterre, ndërsa aktualisht ndodhet në paraburgim. Ai ka mohuar se ishte drejtuesi kryesor i rrjetit, duke pretenduar se kishte shërbyer vetëm si ndërmjetës mes personave të tjerë.
Hetimet e autoriteteve franceze vazhdojnë për të përcaktuar se sa prej planeve të gjetura ishin vetëm ide dhe sa prej tyre kishin kaluar në faza konkrete të përgatitjes.
Rasti ka tërhequr vëmendje të madhe edhe për shkak të përfshirjes së emrit të Mbappés, një prej futbollistëve më të njohur dhe më të vlefshëm në botë.
