Napoli pas 21 ndeshjeve të zhvilluara këtë edicion në Serie A është lider me 50 pikë.
Ka 16 fitore, dy barazime dhe tri humbje.
Por në fundjavë do të ketë punë shumë të vështirë.
Do të ballafaqohet me Juventusin të shtunën nga ora 18:00, në derbin e javës së 22-të të kampionatit elitar të Italisë.
“Zonja e vjetër” është skuadra që ka fituar më së shumti ndeshje ndaj Napolit në Serie A.
Për Antonio Conten do të jetë ndeshje e veçantë. Conte tani e drejton Napolin ku luan edhe kapiteni i Kosovës, Amir Rrahmani, ndërsa në të kaluarën kishte shumë suksese me Juventusin prej vitit 2011 deri në vitin 2014.
Me Juventusin ka fituar katër trofe.
55-vjeçari Conte nga vitit 1991 deri në vitin 2004 ka luajtur edhe si futbollist te “bardhezinjtë”.
Juventusi këtë edicion është skuadra e vetme që ende nuk di për humbje, por ka pasur shumë barazime, 13 gjithsej, dhe ka 37 pikë në vendin e pestë.
Të shtunën luhen edhe dy ndeshje tjera.
Nga ora 15:00 përballen Como – Atalanta kurse Empoli me Bolognan do të luajnë nga ora 20:45.
Atalanta në fundjavën e kaluar u mposht nga Napoli ndërsa ka 43 pikë dhe është në pozitën e tretë.
Fituesi i Superkupës së Italisë, Milani, të dielën nga ora 12:30 luan me Parman.
Milani ka bërë hapa prapa në garën për titull kampioni, ndërsa është këndellur në Ligën e Kampionëve.
“Rossonerët” janë në vendin e tetë me 31 pikë.
Në garë për titull kampioni është Interi që luan të dielën ndaj Lecces nga ora 18:00.
Interi me një ndeshje më pak të luajtur ka 47 pikë, tri më pak se Napoli lider.
Të dielën luan edhe Roma ndaj Udineses nga ora 15:00. Nga ora 20:45 zhvillohet ndeshja Lazio – Fiorentina.
