Federata Evropiane e Hendbollit mori të hënën pasdite vendimin për ndeshjen e kthimit të çerekfinales së Kupës së Evropës mes Partizanit të Beogradit dhe AEK-ut të Athinës.
Kjo ndeshje nuk nisi fare pasi huliganët serbë hodhën mjete shpërthyese në fushën e lojës, në afërsi të lojtarëve të AEK-ut. Fillimisht huliganët serbë i hodhën katër mjete plasëse dhe kjo bëri që lojtarët e klubit grek të largohen për në zhveshtore. Ata u kthyen pas disa minutash, por sërish në drejtim të tyre u hodhën dy mjete shpërthyese. Kjo bëri që ndeshja të mos fillojë fare.
Ndeshja megjithatë do të zhvillohet, por në terren neutral dhe me shumë mundësi pa praninë e shikuesve. Kështu vendosi EHF-ja.
EHF-ja shkruan se ndeshja nuk u zhvillua për shkak të “shqetësimeve të sigurisë në arenë”.
“EHF-ja vendosi të hënën që ndeshja të luhet në një vend neutral, as në Serbi e as në Greqi. Lokacioni i saktë dhe data do të caktohen me kohë. Nisur nga çështjet e sigurisë të së dielës mbrëma, EHF-ja po mendon që ndeshja të luhet pa shikues. Pavarësisht kësaj, do të nisin procedurat ligjore për të vlerësuar situatën rreth ndeshjes të së dielës”, ka shkruar EHF-ja.
Federata Evropiane ka insistuar që rezultati të caktohet në fushën e lojës e jo në tavolinë. EHF-ja ka paralajmëruar se përgjegjësi ligjore kanë të dy klubet.
Ndeshjen e parë çerekfinale, të zhvilluar në Athinë më 22 mars, e kishte fituar AEK-u me rezultat 27:22. Kupa Evropiane është niveli i tretë i garave kontinentale për klube të hendbollit.
Edhe një incident tjetër i rëndë ndodhi në ndeshjen e së dielës në Beograd. Portieri i klubit të futbollit Partizani dhe i përfaqësueses së Serbisë, Aleksandar Jovanoviq pati një konflikt me policinë në hyrje të palestrës. Ai është shtrirë në tokë nga policët, në incidentin që bëri bujë në Serbi. Kanë reaguar klubi i futbollit dhe i hendbollit Partizani, policia serbe, por edhe vetë portieri.
Pjesë e AEK-ut është edhe hendbollisti gjerman, Erik Schmidt. Ai foli për “Bild” për incidentin.
“Para se të fillonte ndeshja tifozët vendas hodhën mjete shpërthyese drejt nesh. Ne më pas e lëshuam sallën për pak minuta. Kur u kthyem, dy mjete të tjera shpërthyese fluturuan dhe ndeshja u anulua. Njëri prej lojtarëve tanë ka pasur probleme me veshin dhe është dashur të kontrollohej nga mjeku në dhomat e zhveshjes”, ka treguar Schmidt.
Huliganët serbë vazhdimisht bëjnë probleme në gara evropiane. Kryesisht janë të pranishëm në futboll, por edhe në ndeshje të sporteve të tjera.
