Ekipi përfaqësues i Italisë në xhudo prej të dielës do të qëndrojë për përgatitje në Kosovë. Kjo është bërë e ditur për KOHËN nga Federata e Xhudos e Kosovës.
Bëhet fjalë për ekipin prej 23 anëtarësh, shumica prej të cilëve janë xhudistë të nivelit më të lartë botërorë. Ndër të tjera në ekipin e Italisë që do të qëndrojë për përgatitje në Pejë është edhe kampionia olimpike, Alice Bellandi. Ajo e fitoi medaljen e artë në kategorinë deri 78 kilogramë në Lojërat Olimpike “Parisi 2024”. Odette Giuffrida është një tjetër top-xhudiste që do të qëndrojë në Pejë. Giuffrida ka medalje të bronztë olimpike në “Rio 2016” dhe të bronztë në “Tokio 2020”. Është kampione në fuqi e botës në kategorinë deri 52 kilogramë. Giuffrida ishte rivale e Majlinda Kelmendit e tani është rivale e Distria Krasniqit. Nga Majlinda kishte pësuar në finale të Lojërave Olimpike të Rios.
Italia ka edhe shumë xhudistë të tjerë të nivelit të lartë.
Falë punës së kryemjeshtrit Driton Kuka dhe nivelit superior të xhudistëve kosovarë, Qendra Nacionale e Xhudos në Pejë është bërë destinacion i lakmuar nga xhudistë të shumë vendeve të botës. Thuajse rregullisht në Pejë vijnë xhudistë të vendeve të tjera për stërvitje.
Javën tjetër do të jenë rreth 60 xhudistë nga vende të tjera. Pos ekipit më të fortë të Italisë do të ketë xhudistë edhe nga Sllovenia, Finlanda, Moldavia e Çekia. Me xhudistët sllovenë do të jetë trajneri i mirënjohur, Marjan Fabjan.
Në Pejë javën e ardhshme do të qëndrojë edhe braziliania Erika Miranda, njëra prej xhudisteve më të mira që ka pasur kategoria deri 52 kilogramë. Ajo ndër të tjera i ka gjashtë medalje botërore. Tani punon si trajnere në ekipin U21 të Brazilit.
Xhudistët elitarë të Kosovës aktualisht nuk po paraqiten shumë nëpër gara. Fokusi i kryemjeshtrit Kuka është që ekipin ta përgatisë për Kampionatin Evropian dhe Kampionatin Botëror. Edhe kampi i javës së ardhshme i shërben këtij qëllimi. Evropiani i xhudos mbahet prej 23 deri më 26 prill në Podgoricë të Malit të Zi. Ndërkohë Botërori është prej 13 deri më 19 qershor në Budapest të Hungarisë. Kosova synon medalje në të dy ngjarjet.
Kryetrajneri i Kosovës në xhudo, Driton Kuka, po punon edhe për rritjen e bazës, përkatësisht të numrit të xhudistëve cilësorë të rinj që do ta mbajnë barrën në ciklet e ardhshme olimpike.
