Përfaqësuesja e Kosovës në hendboll do të jetë pa tri lojtaret kryesore në ndeshjet e vështira me Suedinë. Kosova e Suedia përballen dy herë javën e ardhshme, në fazën e dytë kualifikuese për Botërorin e këtij viti.
Suedia ishte e para në vazon e parë dhe rrjedhimisht kundërshtarja më e fortë e mundshme për Kosovën, që i mungoi fati në short. Sikur kjo të mos mjaftonte, Kosova do të jetë pa tri hendbollistet më të rëndësishme të ndeshjeve të kaluara. Për shkak të lëndimit, Kosovës i mungon kapitenia Leonora Demaj. Ajo ka operuar gjurin javë me parë dhe do të mungojë rreth një vit. Ndërkohë mungojnë edhe motrat Marigona e Arlinda Hajdari. Sipas njoftimit të Federatës së Hendbollit të Kosovës, motrat Hajdari mungojnë për “arsye personale”.
Marigona është qendra e parë e përfaqësueses dhe llogaritet “truri” i ekipit. Ndërkohë Arlinda Hajdari është dirigjente e mbrojtjes dhe po ashtu beku i parë i djathtë.
Lajm i mirë për Kosovën është kthimi i Mirela Gjikokajt, që në fillim të dhjetorit iu bashkua skuadrës lidere në Norvegji, Storhamar. Gjikokaj nuk kishte luajtur nga maji deri në dhjetor të vitit të kaluar, kur mori papritur ofertën e Storhamarit. Me këtë skuadër së fundi u paraqit në fazën e plejofit në Ligën e Kampionëve.
Merlinda Qorraj, që po ashtu luan në Norvegji, është kthyer pas një kohe të gjatë në përfaqësuese.
Ndeshja e parë mes Suedisë dhe Kosovës është më 10 prill në Karlskrona. Ndeshja e kthimit është më 13 prill në Prishtinë. Suedia është favorite e madhe. Ka lojtare të shumta në liga të forta, përkatësisht në skuadra që paraqiten në Champions.
Në dy Olimpiadat e fundit Suedia ka arritur deri në gjysmëfinale, që është sukses shumë i madh. Në gjysmëfinale arriti edhe në Botërorin e vitit 2023, ndërsa në Evropianin 2024 u rendit e pesta. Suedia është përfaqësuesja më e fortë që paraqitet në kualifikime.
Selektori i Kosovës, Agron Shabani, ka ftuar për herë të parë Lorena Matarovën, Ornela Haxhiun dhe Orgesa Golën.
Në fazën e parë kualifikuese, Kosova shënoi fitore ndaj Belgjikës dhe Bosnjë-Hercegovinës. Me këto dy përfaqësuese hendbollistet kosovare u përballën në vjeshtë, në Belgjikë. Por për fazën e dytë, njëjtë si për ciklet e kaluara kualifikuese, u mungoi fati në short.
