Ballkani ka shënuar fitore shumë të thellë ndaj Prishtinës së Re dhe ka dalë në krye të tabelës.
Tri herë kampioni i Kosovës fitoi 6:1 të shtunën në stadiumin e qytetit në Suharekë.
Almir Kryeziu, Walid Hamidi dhe Valentin Serebe i shënuan nga dy gola në këtë ballafaqim. Ndeshja i takoi xhiros së 16-të të Superligës së Kosovës në futboll.
Kryeziu shënoi supergol fillimisht në minutën e 20-të, ndërsa dhjetë minuta më vonë, Hamidi realizoi me kokë për 2:0.
Algjeriani realizoi dy minuta më pas për 3:0.
Kryeziu për 4:0 shënoi në minutën e 53-të.
Ballkani nuk u ndal. Realizoi edhe një herë tjetër me Sereben për 5:0 në minutën e 72-të, ndërsa në minutën e 74-t, golin e vetëm për mysafirët e shënoi Astrit Berisha.
Serebe, pas një veprimi të mirë individual në zonë, e vendosi rezultatin përfundimtar 6:1.
Pas 16 ndeshjeve, Ballkani kryeson në tabelë me 29 pikë, ndërsa Prishtina e Re mbetet e fundit me 14 pikë.
