Mesazhet kundër Kosovës ishin të pritshme dhe që në fillim u shpalosën nga tifozë të ndryshëm. “Kosova është Serbi” është një normalitet për nacionalistët grekë e ata serbë, që shpesh bëhen bashkë nëpër stadiume.
Ditën e djeshme e tepruan në ndeshjen mes Greqisë dhe Kosovës, sidomos në momentin e golit të shënuar. Ultras të kombëtares greke vrapuan të përplaseshin me dardanët, por ndërhynë menjëherë forcat e sigurisë.
Arma e tifozëve grekë ishin flakadanët dhe fishekzjarrët, që nuk u kursyen dhe iu drejtuan tifozëve të Kosovës. Gjithçka është filmuar dhe është postuar në rrjetet sociale.
Lojtarët e Kosovës madje i kërkuan gjyqtarit të ndeshjes që të ndërpritej takimi, kurse kapiteni Rrahmani në fund tha që edhe trajneri i Greqisë e kishte ofendur atë, duke treguar tensionin e madh jo vetëm nëpër tribuna.
