Një moment emocionues për futbollistin e Real Madridit, Vinicius Jr., ka tërhequr vëmendjen e mediave. Pas një iniciative nga Konfederata Braziliane e Futbollit, u zbulua se origjina e tij gjurmohet deri në Kamerun, një detaj që ka emocionuar si lojtarin ashtu edhe familjen e tij.

“Të zbuloj që rrënjët e mia janë në Kamerun është një moment shumë i veçantë për mua dhe familjen time. Më kujton se origjina dhe historia jonë janë të paçmuara,” tha Vinicius, duke ndarë emocionet e tij për këtë zbulim.

Ngannou e mirëpret në “shtëpi”

Në këtë kontekst, ylli i UFC-së dhe një nga sportistët më të njohur të Kamerunit, Francis Ngannou, nuk vonoi të reagojë. Ai publikoi një mesazh të ngrohtë për lojtarin brazilian në rrjetet sociale, ku shprehu dëshirën e tij për ta parë Vinicius-in me fanellën e kombëtares së Kamerunit.

“Kam gati fanellat e mia të VINICIUS JR. për ekipin kombëtar të Kamerunit. Vëlla @vinijr, po presim me padurim të të kemi në shtëpi. @fifaworldcup, ja ku vijmë!” shkroi Ngannou, megjithëse e di që ky skenar është i pamundur, pasi Vinicius tashmë ka luajtur për Brazilin në Kupën e Botës.

Kameruni dhe figura e Ngannou

Francis Ngannou ka marrë rolin e flamurtarit sportiv të Kamerunit në vitet e fundit, veçanërisht pas përfundimit të epokës së artë të ekipit kombëtar që kishte në qendër Samuel Eto’on. Përtej polemikave që shpesh e ndjekin, Ngannou është një tifoz i zjarrtë i futbollit dhe një mbështetës i madh i lojtarëve që kanë lidhje me Kamerunin.

Pavarësisht se është e pamundur që Vinicius të luajë për Kamerunin, reagimi i Ngannou ishte një shprehje e dashurisë dhe krenarisë për origjinën e përbashkët afrikane. Ngannou, gjithashtu, ka treguar se nuk është hera e parë që mbështet yje të futbollit me rrënjë kamerunase.

ARTIKUJ TË NGJASHËMMË SHUMË NGA AUTORI