Ikona polake, Robert Lewandowski nuk do të luajë më për përfaqësuese derisa selektor i Polonisë të jetë Michael Probierz.
Lewa mban rekordin për gola të shënuar me Poloninë, por nuk është grumbulluar për ndeshjet e këtij muaji.
Përmes një komunikate të lëshuar të dielën nga Federata e Futbollit e Polonisë, është bërë e ditur se
“Probierz e ka njoftuar personalisht Lewandowskin, gjithë ekipin dhe stafin stërvitor për vendimin e tij që të emërojë mesfushorin e Interit, Piotr Zielinski, si kapiten të ri”.
Lewandowski ishte kapiten deri më tani, ndërsa pas këtij vendimi shkroi në mediat sociale: “Marrë për bazë rrethanat dhe humbjen e besimit në trajner, kam vendosur të tërhiqem nga përfaqësuesja e Polonisë për aq kohë sa ai mbetet në krye. Shpresoj se do të kem rast tjetër të luaj për tifozët më të mirë në botë”.
Probierz e mori drejtimin e Polonisë në shtator të vitit 2023, por kjo përfaqësuese ishte e para që u eliminua në Euro 2024.
36-vjeçari Lewandowski i ka 85 gola në 158 paraqitje për Poloninë.
