Pas fitores 2:0 ndaj Bjellorusisë, Kombëtarja e Shqipërisë ka nisur punën për ndeshjen e radhës që e luajnë ndaj Lituanisë.
Kuqezinjtë kanë zbritur sot në tapet e “Selman Stërmasit”, ku kanë zhvilluar seancën e radhës stërvitore.
Trajneri Reja është marrë më shumë me futbollistët që nuk u aktivizuan ditën e djeshme, për shkak të freskisë fizike, ndërsa pjesa tjetër kanë zhvilluar një seancë stërvitore shtrydhëse.
Mësohet se Kombëtares ditën e sotme i është bashkuar edhe mbrojtësi Hysen Memolla, i cili ka lënë pas dëmtimin që nuk i mundësoi që të udhëtonte drejt Bjellorusisë me pjesën tjetër të ekipit. Ai është gati për duelin e të hënës dhe do të jetë një alternativë më shumë për krahun e majtë të mbrojtjes, ku Trashi ishte alternativa e vetme deri tani.
Gjithashtu vlen të theksohet se nën urdhrat e Rejës për këtë ndeshje do të jetë edhe sulmuesi Armando Broja, që mungoi ndaj Bjellorusisë për shkak të një kartoni të kuq me Kombëtaren U-19.
Mesfushori Ylber Ramadani është larguar sot nga Shqipëria për t’u kthyer në Danimarkë, për të vazhduar riaftësimin nga dëmtimi që e bëri të humbte këto dy sfida e muajit shtator. /VARKosova/
